備受大量玩家期待嘅《Final Fantasy VII Rebirth》今日正式上市，然而首批實體版遊戲卻搞出大烏龍！

Square Enix昨日發布緊急公告，表示由於Sony印製過程中出錯，導致遊戲實體版兩張光碟「Data Disc（數據碟）」及「Play Disc（遊戲碟）」封面標籤印反，目前已知日本、韓國、香港、台灣、馬來西亞、新加坡、印尼、泰國等地區首批光碟均受影響。

好彩嘅係，雖然印刷上出錯，但並唔會影響遊戲安裝及遊玩，收到錯版嘅玩家只需要率先將印有「Play Disc」標籤嘅黑色光碟放入主機安裝遊戲內容，完成安裝後，再放入印有「Data Disc」標籤嘅白色光碟即可開始遊戲。Sony表示目前正調查今次烏龍事件，相關補救措施將容後公布。