見過唔少人落足本幫部車扮靚、打幾千蚊一個蠟、落十幾廿萬幫部車改裝、甚至使盡渾身解數都要home delivery部「未夠20年」嘅車壇經典番香港，哈哈，偏偏四個轆用緊六、七年前嘅車胎。

好天乾爽靚地，看似問題不大，你可能覺得：極其量係車胎膠質硬化，緩震表現差啲啲啲，行龍翔道拋吓拋吓啫。你唔care，甚至話，呢部車我好天先揸，咁只能用四個英文字回應你：「okok」。

車胎紋深度當下降至少於3mm，好應該更換新胎。另外，即使你部車擺多過用，仲有好深胎紋，但都要留意：輪胎由生產期起第2.5年至第3年（視乎你坐駕放置場地、平均濕度及溫度）已需要更換。

胎肩刻有Slip Sign（見圓圈），提示駕駛者當胎面與三角尖端呈一水平時應馬上換新胎

日本自動車連盟（JAF，Japan Automobile Federation）每年都會提醒當地駕車人士，要趁春夏交接及雨季來臨前檢查車胎狀態。三月下旬該會製作全新專輯，展示擁有足夠輪胎坑紋嘅車胎對濕路駕駛時的制動反應，起著決定性作用。

（由右起）全新車胎、5mm胎紋車胎、2mm胎紋車胎、寒帶雪地路面專用車胎（香港因無需用此類輪胎，故本文省略之）

特輯中分別有直路濕地制動測試及彎路濕地制動測試。好多人會話：「我揸車唔係快，好多時都「龜速」慢線行車，落雨跣胎，『呢啲嘢唔關我事嘅！』」

60km/h喺濕路（直路）制動時嘅制動距離

全新胎（胎紋深度10mm）：平均16.7米

舊胎（胎紋深度5mm）：平均16.7米

舊胎（胎紋深度2mm）：平均18.0米

咦！條數又真係差唔多喎，不過，如果有人喺呢兩、三米內出現，而你又停唔切，咁會點？出年係唔係要喺監獄過生日？

100km/h喺濕路（直路）制動時嘅制動距離

全新胎（胎紋深度10mm）：平均47.6米

舊胎（胎紋深度5mm）：平均50.8米

舊胎（胎紋深度2mm）：平均70.5米

三者嘅差距明顯加大，胎紋深度只有2mm嗰位巴打，可能已經攬咗山。

60km/h入彎時制動所需距離

全新胎（胎紋深度10mm）：平均19.4米

舊胎（胎紋深度5mm）：平均19.5米

舊胎（胎紋深度2mm）：平均20.6米

驟眼睇，制動所需距離差不多，你可能會話，Chiu！咪又係差唔多。睇埋B、C兩項距離先判斷都未遲。

全新胎（胎紋深度10mm）：前、後輪與彎心的距離，分別為1.3米及1.1米

舊胎（胎紋深度5mm）：前、後輪與彎心的距離，分別為2.2米及1.9米

舊胎（胎紋深度5mm）：前、後輪與彎心的距離，分別為2.6米及2.2米

啊先生，想問如果你喺山路，重brake之後向外彎飄多0.9米至1.1米，而對面又啱啱有部重型車迎面殺到，你估你班friend呢次要唔要夾錢做帛金？