Pixar於2009年推出嘅動畫電影《Up!》（沖天救兵），憑開場幾分鐘、冇對白嘅畫面就逼哭無數人而成為經典，電影中嘅「氣球飛天屋」亦成為Pixar標誌之一。而為咗興祝《Up!》上映15週年，Pixar就同Airbnb於美國整咗一間完美還原電影、綁住8,000個氣球、仲真係「識飛」嘅氣球屋出黎，只要上網報名就有機會免費入住。

Airbnb上嘅「Drift off in the Up house」以《Up!》老人家主角「Carl」嘅名義撰寫，Carl表示「雖然我唔係好鍾意訪客」、「但我學到最好嘅冒險永遠都係你愛嘅人一齊去」，所以邀請各位去佢屋企作為人生冒險嘅第一站，「並於離開前欣賞著我間屋飛上天」。從網頁中嘅照片可見，呢間位於美國新墨西哥州嘅特別房屋，由上至下、裏至外都忠實還原電影中嘅氣球屋屋。入面除咗會有Carl同Ellie多年黎收集嘅冒險紀念品之外，上方亦真係掛咗8,000個氣球，不過飛天就唔係靠啲波波，而係靠間屋不遠處嘅巨型吊臂。

網頁亦寫到住客會以「初級野外探索員」嘅身份入住，期間會有創作個人冒險日記、於草坪上野餐、進入野外冒險、觀星等多個活動。而如果大家想免費入住「氣球屋屋」，就要去到Airbnb嘅活動網頁報名，並跟據指示撰寫不多於500字嘅文章。

資料來源：Airbnb