位於日本河口湖嘅Lawson便利店因為有富士山做背景，近年成為日本熱門旅遊景點之一，但就因為遊客太多，造成當地交通、嘈音、垃圾等困擾，結果當地政府於上週就正式用黑布圍封Lawson對面馬路，阻擋遊客拍照。咁你話你仲想拍到呢個美景可以點做呢？答案可以係「自備一間Lawson」！

卻說早於上月底，當地政府就宣佈會圍封河口湖Lawson，而日本藝術家「現代美術二等兵ふじわらかつひと（f2touhey）」就於本月中製作一個完美還原「河口湖Lawson」嘅模型發佈到佢嘅X（Twitter）上面。「現代美術二等兵ふじわらかつひと」冇公佈模型嘅大小比例，但從圖中可見間Lawson大約係手掌大小，連下面個地基就大約A4紙大。雖然未至於放入褲袋就行得，但正如「現代美術二等兵ふじわらかつひと」於帖文中留言表示：「為了不打擾街坊，我們製作了一間便攜Lawson，只要見到富士山，你就可以在任何地方拍攝『富士山與Lawson』了。」

近隣の方々に迷惑をかけないように
持ち運べるローソンを作りました。
これで富士山さえ見えれば、
どこででも「富士山＆ローソン」の写真が撮れます。 pic.twitter.com/zjFYhGtJPS

— 現代美術二等兵ふじわらかつひと (@f2touhey) May 19, 2024

「現代美術二等兵ふじわらかつひと」呢篇帖文獲得超過250萬次觀看、3.7萬個讚好、7700次轉發。唔少人都留言希望呢個Lawson模型能夠量產；亦有人提議Lawson官方可以同「現代美術二等兵ふじわらかつひと」合作，推出官方模型，最好就連埋富士山背景，咁就可以賣畀啲遊客啦。