去年5月時，日本集英社宣佈會推出「條漫」平台「JUMP TOON」，意圖打入呢個目前被韓國佔領嘅新興漫畫戰場。事隔足足一年，上週集英社正式宣佈推出「JUMP TOON」嘅iOS及Android應用程式，同時推出29部條漫作品，當中除咗原創新作之外，仲有《排球少年》、《金魚妻》等熱門作品嘅條漫版。

所謂「條漫」(Webtoon)，其實係針對手機用戶嘅網絡漫畫創作型式，與普通漫畫最大嘅分別，就係觀看方法由傳統嘅左右揭頁，變成由上而下「碌」，亦令漫畫嘅構圖分鏡方式有所改變。目前條漫市場由韓國主導，並主要有Line Webtoon及KAKAO Webtoon兩大平台，唔少著名條漫例如《與神同行》、《梨泰院Class》等曾亦被改篇成韓國影視作品。

而去年集英社宣佈會推出「JUMP TOON」，一方面固然係趕上條漫趨勢，另一方面亦係為咗令創作條漫嘅日本漫畫家能夠有自己嘅平台推出新作。

圖片：截圖自JUMP TOON

據「JUMP TOON」官網顯示，目前「JUMP TOON」上總共會連載29部作品，涵蓋「學園」、「浪漫」、「復仇」、「戰鬥」、「異世界」、「懸疑」等多個類別，當中仲有《排球少年》、《金魚妻》、《搞笑漫畫日和》嘅全彩條漫版本，明顯係為吸引傳統漫畫讀者嘗試條漫。另外條漫嘅連載方式亦與傳統漫畫有所不同，並非全部隨週刊推出而每週定期更新，而係將眾多作品分成7組，分別於一個禮拜7日更新，有啲似日劇嘅更新方法。

當然，「JUMP TOON」應用程式目前只限日本本土下載，但大家亦可以去「JUMP TOON」官網觀看。值得一提嘅係，目前每部作部後面都有「無料（免費）」二字，換言之未來作品有可能要畀錢先有得睇。

資料來源：JUMP TOON