|
科幻小說及同名電影《沙丘》中，住喺厄拉克斯星嘅弗瑞曼人（Freman）研發咗一種能夠收集穿著者排出嘅水份（包括尿液及汗水），並過濾成可飲用水嘅「Stillsuits」。近日有科學家就以此為靈感，研發出一種能夠循環使用太空人尿液嘅新型維生系統，以協助太空人更長時間、更舒適健康地進行艙外活動，而且有望於未來嘅登月任務中使用。 |
|
 |
|
|
來自美國Weill Cornell醫療中心嘅Sofia Etlin及其團隊，早前於科學期刊《Frontier》上發佈論文公開呢項新研究。據論文表示，呢個新系統主要包括一個外部導管尿液收集系統，以及一組正反滲透過濾裝置。太空服中將會有一個用於收集尿液嘅矽膠杯（男女不同），當中嘅感應器檢測到濕度提高後就會自動啟動，將約85%嘅尿液吸到過濾裝置，而過濾裝置又可以濾走尿液中嘅鹽份、尿素、尿酸、阿摩尼亞以及鈣質，將當中約75%嘅尿液變成可飲用水。 據知呢項計劃本身就係為NASA研發，所以有望用於預計2025年9月開始嘅「Artemis II」繞月計畫，以及預計2026年9月進行嘅「Artemis III」登月計劃之中。 |
|
 |
|
|
據論文表示，以往太空入進行艙外活動時，為咗減少排泄物，所以事先需要限制飲食，或進食「低殘留物餐單」，但兩者都會影響太空人進行活動嘅體力；後來太空人改用叫做Maximum Absorbency Garment (MAG)嘅尿片，但咁就代表太空人嘅下身可能要浸泡於排泄物中，導致尿道感染或腸胃不適。另一邊廂，現時太空服配備嘅0.95L水袋，又不足夠為太空人提供足夠嘅水份。所以佢哋就以《Dune》中嘅「Stillsuits」為靈感，研發出呢套能夠太空人更舒適健康、同時彌補飲用水不足嘅裝置。 不過論文亦強調，系統目前只係原型機階段，未來仲需要繼續研究及調整，先可以實際用於太空任務之中。 |
|