由Michael Caine、Tom Courtenay及Michael Gambon等人主演嘅2018年電影《King of Thieves》根據2015年發生嘅真人真事改編，講述多位有前科嘅老年盜賊希望於臨終前再整一餐「大茶飯」，而密謀盜竊英國一個地下金庫。而近日日本亦發生咗一件非常相似嘅事件，話說北海道近月發生多次入屋爆竊事件，而警方破案後，發現犯人竟然係三名加埋227歲嘅「老賊」。

《King of Thieves》海報

據日本傳媒報導，呢三位被稱為「G3S」（即日本「老人」じいさんず諧音）嘅盜賊分別為現年88歲嘅「海野秀男」、70歲嘅「松田秀美」，以及69歲嘅「渡邊健一」。案情指出三人先於5月19日進入北海道別江事一座空屋中，盜去200元現金（我冇寫錯）及三支總值一萬元左右嘅威士忌；三人於6月20號再次犯案，於札幌市一間空屋中盜走共24件項鍊、戒指、手錶等物品，4日後屋主回家發現失竊並報案，警方接手調查，並於7月17日發現三人意圖將贓物換成現金而將三人拘捕。

據知三人都係曾經入獄嘅前科犯，事實上三人正正係於監獄內認識，繼而合謀犯案。三人犯案時亦各施其職，年齡最大嘅「海野秀男」負責入屋爆竊，70歲嘅「松田秀美」負責開車接送，而69歲嘅「渡邊健一」剛負責保管贓物。據報光札幌市近期就有數十宗入屋爆竊案，當地警方正調查與「G3S」是否有關。

資料來源：uhb