星球大戰外傳劇集《侍者》（The Acolyte）因評價兩極兼收視差而慘遭腰斬，唔少人都為李政宰感到可惜。最近有知情人士爆料，其實製作團隊起初打算邀請Keanu Reeves主演，而對方亦感興趣，但最後因為檔期衝突未能成事。

據荷里活資深記者Jeff Sneider爆料，《侍者》劇組最初打算由Keanu Reeves飾演Jedi大師Sol，對方亦對此感到非常有興趣，卻因為要拍攝《John Wick》外傳電影《Ballerina》而撞咗期，換言之《廿二世紀殺人網絡》二人組差啲就可以喺星戰宇宙重聚！（雖然唔夠10分鐘，有睇嘅朋友就明...）Jeff Sneider認為，儘管今次未能成事，但盧卡斯影業已注意到Keanu Reeves嘅意向，所以觀眾未來仍然有機會見到Keanu Reeves現身於其他星戰作品。

順帶一提，雖然《侍者》被狠批「過度政權」，不過影視作品呢樣嘢向來都係各花入各眼，覺得套劇好睇嘅影迷最近就發起網上聯署，要求迪士尼回心轉意再拍多季，短短一星期已收集到45,500多個簽名。