|
黃子華曾經提出「鐵達尼極限」，亦即電影《Titanic》中Jack同Rose嘅愛情之所以咁刻骨銘心令人感動，係因為佢只係熱戀咗3日就遇到沉船，根本無機會令段感情進入「唔新鮮」嘅狀態。而近日一個兩性關係研究唔單止證實咗「鐵達尼極限」嘅邏輯，仲算出情侶分手嘅界線，或者會令大家對於點樣經營一段關係有所啟發。 |
|
|
|
|
|
卻說為咗了解兩性關係嘅長期變化，所以兩位來自德國嘅心理學教授利用美國加州自1971年開始嘅世代調查（Longitudinal Study of Generations）中嘅長期數據，再加能夠量度情侶或夫妻關係滿足度嘅「Gilford-Bengtson婚姻滿足度評分表」——即一系列如「你與你的伴侶過得很開心」、「你們對於某些重要的事有不同看法」等嘅問題——嘗試搵出有啲咩會影響滿足度，去到咩地步又會分手或離婚。 研究首先發現，普遍而言所有關係嘅滿足度都會隨時間而下降，而當滿足度跌到上述評分表嘅65%以下時，就係「分手界線」。換言之所有關係只要一開始就係一個「扣分」嘅過程，而關係嘅「開始分數」，以及關係之中扣分速度有幾快，就係左右關係有幾快到達「分手界線」嘅因素。 |
|
|
|
|
|
咁有咩因素影響開始分數同扣分速度呢？研究撇除年齡、喜好等個體因素之後，發現家庭中有小朋友嘅人，關係滿足度會較低；另外年輕人嘅「扣分速度」亦會比較年長者為快。更有趣嘅係，研究發現當某人經歷分手後開始一段新關係，新關係嘅「開始分數」，普遍會比上段一關係嘅「開始分數」高。但你又唔好以為不停分手、拍新拖就可以Chok出一個超高開始分數喎，事關研究亦發現分手後隔比較耐先開始嘅新關係，開始分數會分手後好快開始嘅新關係高。換言之分手後等一等、沉澱一下先搵新對象，可能係好事黎。 雖然呢個研究仍然非常初步，無法點出所有會影響開始分數同扣分速度嘅變數。但從中可以發現嘅係，感情其實係需要經營嘅，點樣令扣分速度減慢——又或以「鐵達尼極限」說法：保鮮——就係關係能否持續嘅關鍵之一。 |
|
