Ubisoft自從宣佈推出有黑人「武士」彌助做主角嘅《Assassin's Creed: Shadows》之後，就因為被批評「過份政治正確」而處於輿論嘅浪口風尖之上。而近日有國外YouTuber引述Ubisoft內部員工爆料，除咗爆出更多關於《Shadows》嘅內幕資訊，更指出遊戲業界並無因為玩家強烈抗拒而對「DEI（多元共容）文化」有所卻步，反而打算於遊戲中繼續「偷渡」相關元素。

圖片：Ubisoft

近日Ubisoft因為推出一個含有令人聯想到廣島原爆嘅單腳鳥居嘅《Shadows》Q版人偶而再次引起日本玩家群不滿；加上一名被人發現係「Sweet Baby Inc.」前員工嘅「遊戲業界日本顧問兼翻譯者（自稱）」，於《New York Times》上暗示日本玩家對《Shadows》嘅負評，都係西方玩家用翻譯軟件偽造，令Ubisoft再次成為玩家們嘅重點關注對象。

而擁有28萬訂閱嘅YouTuber「ENDYMIONtv」，亦於日前收到數位Ubisoft內部人士嘅爆料。據內部人士指出，《Shadows》於2020年開發初期時，其實係有個日本人男主角，甚至已經造好某部份美術圖及動畫，但後來就改成依家嘅「黑人武士」彌助。爆料者指佢唔清楚換角嘅原因，但認為Ubisoft被當時嘅「社會政治事件」，即George Floyd事件及之後嘅「BLM」運動「深深影響」，而且真心認為換成彌助做主角會取悅玩家群。佢哋甚至認為《Shadows》會比前作《Valhalla》賣得更好（系列第二高銷量），所以於遊戲內加入系列最多大嘅商城諗住大賺一筆。

不過爆料者亦指出，《Shadows》目前嘅預購量僅為《Valhalla》同期嘅7%，加上Ubisoft被上述「單腳鳥居」事件中日本玩家嘅強烈反應嚇親，所以早前先宣佈《Shadows》會延期至明年2月發售，並開始修改遊戲內容。其中「肯定會被移除」嘅包括彌助嘅Rap主題音樂，以及一大段彌助關於自己被白人出賣、憎恨白人、認為要消除白人特權等含有政治元素嘅對白。

但你又唔好以為Ubisoft係「浪子回頭」喎。因為根據爆料者指出，包括Ubisoft在內嘅一眾遊戲廠商，雖然清楚知道所謂「玩家門2事件」（即近來因為Sweet Baby Inc.引起嘅一連串事件）嘅來龍去脈，但完全冇打算因此而改變其「政確」立場。唯一會變嘅，只係未來廠商於宣傳遊戲時會避免提及政確元素，換言之玩家要到買咗隻Game、玩緊嘅時候先會發現遊戲原來係有相關題材，令玩家無法再杯葛遊戲又或退款。爆料者甚至指出Ubisoft有意推出「女性角色主導遊戲世界」，即未來會有越多越多以女性為主角嘅遊戲、男性角色嘅數量及重要性都會降低，以減少遊戲內嘅「雄性元素」。