憑出演《Euphoria》一炮而紅嘅Sydney Sweeney近年極速上位，接戲接到冇停手，更被封為新世代性感女神，隨住人氣上升，自然亦成為狗仔隊跟拍對象。最近Sydney Sweeney接受訪問時就大呻，狗仔隊已經跟到去佢屋企，甚至要求佢著Bikini擺拍先肯離開，令佢覺得安全受到威脅。

最近Sydney Sweeney接受《Glamour》雜誌「2024年度女性」專訪時表示，最近狗仔隊愈嚟愈倡狂，甚至跟蹤到屋企門外，誓要影到佢著Bikini先肯離開：「佢哋喺屋外對住我家人大叫大喊：『只要你哋叫Sydney Sweeney著住Bikini出嚟，我影完相就會走人，唔會再煩你。』」與此同時，佢亦反駁網絡上指佢自己搵狗仔隊炒作嘅說法：「我有咩可能會請狗仔隊嚟我屋企影相？當時我嘅堂表親同家人都喺度，而我自己就喺後花園，我點會想咁做呢？我有呢班人坐住獨木舟匿埋喺海邊草叢嘅相，佢哋朝早8點已經出現，一直到下午4點先離開。」

不過最令Sydney Sweeney困擾同擔心並唔狗仔隊嘅行為，而係怕照片一旦公開，所有人都會知道佢住邊，對佢安全構成威脅。Sydney Sweeney表示：「依而有船經過，我有時都會聽到有人話：『呢到係Sydney Sweeney屋企呀』我屋企前院已經變成觀光景點了。」

除此之外，訪問中亦談到Sydney Sweeney身材經常成為外界焦點。對此，佢就採取正面態度，表示好多年輕Fans因為佢而變得對自己身材更有自信，令佢感到非常欣慰：「呢啲評論對我嚟講意義重大，因為我相信賦予他人力量，並對自己身體有自信，以及擁抱自己性魅力非常重要，所以如果你有胸部，咁就好好炫耀一下。」