Casio G-SHOCK旗下嘅2100系列因為有住同「Royal Oak」頗為相似嘅八角錶圈，所以又有「農家橡樹」之稱，而且深受G-SHOCK愛好者喜愛，當中全金屬嘅GM-B2100系列更一度賣到斷哂市仲有炒價。近日G-SHOCK就推出睇落更「斯文」（相對黎講啦下）嘅全金屬三圈計時款GMC-B2100，唔知又會唔會掀起另一股熱潮呢？

從輪廓黎睇，新GMC-B2100同GM-B2100嘅分別其實不大，同樣用上全不鏽鋼錶殼及錶帶、同樣保留八角錶圈，最大分別在於3點鐘位置多咗個為配合計時功能而出現嘅八角型計時錶冠。改得最多嘅其實係錶面格局，首先取消GM-B2100系列嘅LCD顯示屏，改為三圈全指針顯示。原本位於九點鐘位置嘅功能轉盤移咗去12點位置，9點位置改成呼應八角錶圈嘅日期顯示，6點位置就係計時錶圈，新增嘅日期窗則位於4、5點時標之間。另外時分秒三針及時標都採用拋光打磨，能夠更清楚地顯示時間。

至於功能上，GMC-B2100就同GM-B2100如出一轍。高度抗震、20 Bar防水，兩地時間、太陽能充電、Smartphone Link連接手機App等應有盡有。顏色方面就有黑色錶面嘅GMC-B2100D及天藍色錶面嘅GMC-B2100AD。目前唯一美中不足之處就係目前未知價錢及發售日。

資料來源：PRNewsWire