當年《遊戲王》動畫中，武藤遊戲憑住一手「天胡 黑暗大法師（艾克佐迪亞）」擊敗海馬瀨人，成為動畫嘅名場面之一。而近日台灣官方遊戲王比賽中，就有玩家重現出呢個極低機率嘅奇蹟，開局直接抽到「黑暗大法師」五件套直接獲得勝利。網民見到都高呼呢位玩家係「用陽壽在抽牌」，從網上流傳影片更見到在場觀眾均為該位玩家股掌致意。

所謂嘅黑暗大法師（艾克佐迪亞），其實係《遊戲王》中嘅五張特別卡牌，分別為「被封印的艾克佐迪亞」以及「被封印的右腕」、「右足」、「左腕」、「左足」。呢五張牌各自打出時無咩特別之處，但若果玩家能夠於手牌集齊五張牌，就會發動「獲得本次決鬥勝利」嘅特別效果。

而上週六於台灣舉行嘅官方3對3比賽第二輪中，有玩家就於一開局時成功抽到組成黑暗大法師嘅5張牌，立即打出獲得該局勝利，即所謂嘅「天胡」。比賽嘅照片被觀眾放上FB後，立即於《遊戲王》圈中瘋傳，有人更計算出要於52張牌嘅牌組，接連抽出5張指定卡牌嘅機率僅為0.000038%，亦即1/658008。絕對稱得上係奇蹟。

雖然呢位台灣玩家並非史上首位完成「奇蹟」嘅人，但當打出「黑暗大法師」時，仍然獲得在場超過900名參加者及觀眾嘅熱烈掌聲。FB帖文下亦有唔少網民指該名玩家「用陽壽在抽牌」、「人品一定很好」、「今日的賽事不管怎樣，他都是贏家」。