早前喺英國搞首映，令觀眾睇到又嘔又走嘅血腥恐怖電影《劊樂小丑3（Terrifier 3）》上周五在北美正式上映，開畫三日就大收1,800萬美元，成功砌低另一部同樣以「小丑」為主角嘅電影《小丑：雙瘋（Joker: Folie à Deux）》，奪得上周末北美票房冠軍。唔知香港院線有冇機會上映呢？

由Damien Leone執導嘅《Terrifier》系列以血腥虐殺場面聞名，主要係睇殺人狂小丑「Art」如何透過各種意想不到嘅方式殘殺受害者，備受恐怖片迷青睞，前兩集都成功刀仔鋸大樹，分別以10萬及25萬成本斬獲41.6萬及1,570萬美元票房。

嚟到第三集，除咗預算大增至200萬美元，尺度似乎亦進一步超越前作，早前就有外媒指電影在英國首映時，唔少觀眾都睇到頂唔順要離場，甚至有人當堂嘔埋出嚟。電影日前於北美正式上映，開畫三日就大收1,800萬美元，除咗回本有凸之餘更超越埋上一集總票房成績，同時奪下上周北美周末票房冠軍。

至於另一部同樣以「小丑」作主角嘅億元大作《小丑：雙瘋》就唔係咁理想，上周末僅收得700萬美元票房，比前一個周末(同時係首映周)大跌81%，現時全球票房累計1.653億美元，預計極大機會要蝕本收場。