Amazon Prime 今年初推出嘅電玩改編真人劇集《Fallout》口碑非常唔錯,而好成績似乎令佢哋更有信心推出更多同類劇集,而且有更高期望及要求。所以最近就有消息指,Amazon Prime會「砍掉」2022年公佈嘅《God of War》真人劇集,由零開始重新製作。
自2022年12月公佈後,真人版《God of War》就由Marvel《Agents of S.H.I.E.L.D.》及Amazon Prime《The Wheel of Time》製作人、同時又係電玩改編真人電影《Uncharted》編劇嘅Rafe Judkins領導開始前期創作。而除Rafe Judkins之外,曾經撰寫過《Children of Men》及《Iron Man》劇本嘅Hawk Ostby及Mark Fergus亦係創作團隊主要成員。據報佢哋已經為《God of War》完成咗第一季劇本,而且Sony及Amazon Prime都對劇本感到滿意。
但近日外媒就報導指,Rafe Judkins等人已經離開《God of War》嘅創作團體,Amazon Prime有意招募另一批編劇創作一個全部嘅劇本。報導並無講明今次Amazon Prime決定「砍掉重練」嘅原因,只係話「睇黎係想轉去一個新嘅創作方向」。另一邊廂,以《God of War》遊戲製作人身份參加劇集嘅Santa Monica Studio人員,包括創意總監Cory Barlog等人,就會繼續參與劇集創作。