MCU新版《Blade（刀鋒戰士/幽靈刺客）》經歷多次換導演及編劇後，如今更宣布無限期延後上映，莫非好似Wesley Snipes所講：「世上只有一位刀鋒戰士，以後、永遠都是如此」？

據外媒《Variety》報導，近日迪士尼更新旗下電影上映日程表，將原定2025年11月7日上映嘅新版《Blade》撤走，由鐵血戰士全新獨立電影《Predator: Badlands》取而代之。與此同時，官方亦新增了三部尚未命名嘅MCU電影，分別於2028年2月18日、2028年5月5日及2028年11月10日上映。

早於2019年宣布製作、由金獎影帝Mahershala Ali主演嘅新版《Blade》可謂出師不利，先係首任導演於開拍前一個月突然唔撈，然後又遇上荷里活罷工潮被迫停工，好不易搵到新導演接手，點知又因為「創意分歧」退出製作，而編劇亦都換咗5次。目前最新嘅編劇為曾執筆《Thunderbolts*（雷霆特攻隊*）》、《Black Widow（黑寡婦）》嘅Eric Pearson。

雖然面對重重困難，但Kevin Feige並冇打算放棄製作呢部電影，早前接受Black Tree TV訪問時就表示：「過去幾年我哋一直在努力，對我哋而言最重要並唔係急功求成，而係確保拍出一部理想嘅《Blade》。」