有得揀，絕大部份人都唔會想返工。而返工最麻煩嘅其中一點，就在於要真係「返」去工作地點，亦即日本所謂嘅「通勤」。根據日本嘅一個新研究，通勤時間唔單止會影響你嘅睡眠時間，更會令你壓力倍增！

話說日本地產兼建屋裝修網站「myhm」早前公開咗一個有關通勤時間嘅研究。佢哋搵黎400名住喺關東四縣（即神奈川、千葉、埼玉及茨城），但要去東京23區返5日工嘅人，並按每日要花嘅通勤時間將受訪者分成「30分鐘以下」、「30分鐘至一個鐘」、「一個鐘或以上」三組，並就佢哋嘅睡眠時間、壓力程度等進行問卷調查。

結果發現，通勤時間為「30分鐘以下」嘅組別，平均每日睡眠時間為6小時25分鐘、但「一個鐘以上」組每日只瞓得5小時54分，兩者相近30分鐘，換言之通勤時間多出黎嗰三十分鐘，幾乎完全由犧牲睡眠時間黎彌補。報告仲引用其他研究，指出每日睡眠時間不足6小時的話，可能會令集中力及生產力下降，又會增加壓力及降低身體免疫力，同時仲增加患上慢性疾病嘅風險。簡單黎講就即係百害而無一利。

圖片：maidonanews.jp

關於通勤時間與壓力之間嘅關係，調查亦有進一步提問。當被問到「每日通勤令你有幾大壓力？」時，「30分鐘以下」組別有超過四成人表示「完全無壓力」，而感到「非常有壓力」嘅人只有4.2%；但「一個鐘以上」組別中，就只有16.7%認為「完全沒壓力」，比起「30分鐘以下」組少四成；同時有33.8%人表示「非常有壓力」，係「30分鐘以下」組嘅8倍！

另外調查亦發現通勤時間「一個鐘以上」組別，每日留喺屋企嘅平均時長為9小時26分鐘，其中5小時53分（約63%）係用黎瞓覺，換言之真正嘅「Me Time」只有3小時33分鐘，大概就係食個飯、沖個涼，碌下電話就冇咗。

總結而言，就係通勤時間一長，你就瞓唔夠，然後影響你嘅生理及心理健康。

資料來源：maidonanews.jp