近年主張多元共融文化嘅迪士尼，最近被爆出抽走Pixar新作《Win or Lose》跨性別情節，難道佢哋都開始害怕「Go woke, go broke」？

迪士尼旗下動畫工作室Pixar首部動畫劇集《Win or Lose》（港譯：贏定輸）將於明年2月播出，故事圍繞一隊男女混合中學壘球隊展開，講述眾人在迎接錦標賽前一周所發生嘅事情。每集會從不同角色視角出發，揭示各人真實感受，包括冇自信嘅小孩、直昇機家長，以及感情受創嘅裁判等等。

最近有外媒爆料，原本球隊內有一名跨性別球員，但迪士尼喺幾個月前決定抽走相關對白同劇情，讓該角色變回一名順性別異性戀少女。消息傳出後，迪士尼隨即證實並解釋：「當談到面向年輕觀眾嘅動畫內容時，我哋明白好多家長希望以自己嘅方式與時間，向小朋友討論某些話題。」

對此，為該角色配音嘅跨性別演員Chanel Stewart坦言，佢當初係因為呢個角色嘅跨性別設定而去試鏡，如今迪士尼作出修改令佢感到非常沮喪：「從攞到劇本嗰刻開始，我就好興奮可以分享我嘅經歷，以幫助及賦權(empower)其他跨性別青少年。我知道呢個會係一個好重要嘅對話。跨性別嘅故事好重要，佢哋值得被聽到。」