由龍幸伸創作嘅《膽大黨》近來改編成動畫，並以優秀製作及劇情成為本年度大熱動畫之選。唯一美中不足嘅，或者就係上個星期播完嘅第一季，竟然係從篇章嘅中途截斷，睇到人到喉唔到肺。好在官方隨即於星期日舉行嘅《Jump Festa 2025》上公佈將製作第二季，仲已經定埋播放日期，明年暑假大家就可以睇到故事後續啦！

從《Jump Festa 2025》率先發佈嘅第二季PV，可見第二季故事將會接續目前開咗個頭嘅「詛咒之屋篇」，講述小桃、厄卡倫及寺仁一行人，處理寺仁家中嘅靈異問題。「詛咒之屋篇」嘅重要人物「鬼頭凪（鬼頭ナキ）」以及「邪視」亦有於PV中出現。而PV嘅最後就出現寺仁被邪視附身後嘅形態，所以第二季應該會進入再之後嘅「邪視篇」。

《膽大黨》第二季預定於2025年7月播放。