2024年即將完結，唔少企業都把握最後幾日為未來作出安排。例如Warner Bros. （WB）日前就宣佈改動未來兩年嘅電影上映計畫，而且無獨有偶地兩個改動都同Robert Pattinson有關。

按上映時序黎睇，第一個改動係明年3月7日嘅檔期。此檔原本係由Michael B. Jordan主演、兩部《Black Panther》導演Ryan Coogler執導嘅《Sinners》佔據，但WB就宣佈會將其延後約一個月，到4月18日先上映。據《Deadline》報導，延後原因係電影採用全菲林拍攝，而目前冇足夠人手去處理後製，所以要多一個月時間。

但大家更在意嘅，或者係原本定於4月18日檔期、奉俊昊執導、Robert Pattinson主演嘅《Mickey 17》，就會同《Sinners》交換檔期，換言之即係提早個令月於3月7日上映。《Mickey 17》乃奉俊昊憑《上流寄生族》奪得奧斯卡最佳影片、最佳導演等多個大獎後嘅首部作品，而且係奉俊昊首部「全荷里活電影」（《末世列車》都仲有宋康昊），成果如何值得期待。

而Robert Pattinson主演嘅另一重榜電影、本來預定2026年10月2日上映嘅《The Batman: Part 2》，仲被宣佈延後一整年到2027年10月1日。背後原因係好簡單嘅「拍唔切」，事關電影拍攝預計今年夏天先正式開始，要喺一年多啲嘅時間內完成一部又動作又CG嘅超級英雄電影拍攝及後期製作，本身就唔太可能。

而頂替2026年10月檔期嘅，就係由《The Revenant》導演Alejandro G. Iñárritu執導、「阿湯哥」Tom Cruise主演嘅新作。此作係於今年2月首次公佈，但除咗執演及主角之外，目前一切都未對外公佈，所以唔好講故事大綱，連電影名都未有。

資料來源：Deadline