|
正所謂，橋唔怕舊，最緊要受！最近一名法國婦人就因為誤信假扮成畢彼特(Brad Pitt)嘅騙徒，以為自己真係同呢位著名荷里活男神相戀，不惜同富豪丈夫離婚，更被騙走83萬歐元贍養費，最後才醒覺自己是詐騙受害者，人財兩失。 |
|
 |
|
|
最近一位化名為Anne嘅53歲法國婦人，在新聞節目《Sept à huit》訴說自己被「AI畢彼特」騙走約83萬歐元嘅經歷，引起網民熱烈討論。事緣於2023年2月，Anne與家人到法國阿爾卑斯山滑雪度假，並首次使用Instagram分享旅行打卡照片，結果收到一位自稱係畢彼特媽媽嘅人私訊，指佢好適合自己個仔，諗住介紹畀佢。其後，佢就收到一位自稱係畢彼特嘅人傳來訊息，並開始交談。起初Anne都唔相信對方真係畢彼特，但因為對方不斷發送AI改圖自拍照、甜言蜜語、情詩、甚至護照副本，最終成功冧到Anne信以為真，並發展成網戀關係。Anne甚至在節目上坦言：「我好鍾意呢個同我傾計嘅男人，佢好識得點解同女性交談。」
|
|
|
|
|
隨住時間推演，呢位「畢彼特」開始作出行動，先係向Anne表示自己買咗好多名牌想寄畀佢，不過就要佢支付9,000歐元「報關費」，結果當然係錢就畀咗，但禮品就從來都冇收到。後來呢位「畢彼特」更向佢求婚，Anne為咗同呢位真命天子一齊，就選擇同原本已經關係麻麻嘅富豪丈夫離婚，並分得77.5萬歐元(約620萬港幣)贍養費。「畢彼特」得知此事後，就向Anne聲稱自己患上胃癌要錢做手街，但因為同前妻Angelina Jolie打緊離婚官司，銀行戶口被凍結，要求Anne轉錢畀佢，更發送多張臥病在床嘅假照片、假扮主診醫生向Anne表示「畢彼特正為生存而奮鬥！」，結果Anne就將大約80萬歐元轉到呢位騙子戶口。 直到2024年夏天，Anne從新聞上見到畢彼特同珠寶時尚產業女強人Inés de Ramon交往嘅合照後，先醒覺自己落入一場精心設計、持續長達18個月嘅大騙局。
|
|