|
新年將至，又係大家同班親戚聚首一堂，講下往事嘅日子。而有時兄弟姊妹坐埋一齊，就可能會傾下細個父母最偏心邊個，而通常大家嘅結論都係「反正唔係我」。問題係，父母係咪一定會偏心某一個子女呢？而若果真係偏心，又究竟會以咩準則去決定偏心邊個？係咪同大家所諗一定係偏心最細嗰個，又或係重男輕女偏心個仔？近日一個外國研究就可能會為你帶來新嘅啟發。 |
|
 |
|
|
美國心理學會上個星期發佈咗一個有關父母偏心行為嘅研究結果。研究從30篇相關學術論文，再加上14個資料庫中，收集咗近2萬個樣本資料，並分析子女嘅出生次序、性別、個人氣質及性格特質（例如聽唔聽話、外唔外向、是否情緒化或有冇自覺性等）如何影響父母對佢偏唔偏心。而父母嘅偏心行為，就體現於與子女之間嘅互動方法及時間、花喺子女身上嘅錢嘅多寡、以及對子女嘅控制程度（即係有幾縱容）等。 結果就發現，子女出生順序與父母會否偏心嘅關係非常薄弱，換言之父母唔一定會偏心細佬或細妹，父母反而會因為覺得哥哥、姐姐們更成熟，而給予更大嘅自主性。另一邊廂，子女嘅性別就係偏心行為嘅有力預測變數，因為研究發現不論係爸爸定媽媽，都係會偏心女兒。另一影響父母偏心行為嘅，係子女本身嘅性格特質。研究發現自覺性高，亦即更有責任感、更有條理，又或通俗啲講更「乖」嘅子女，係會更傾向得到父母嘅偏愛；反而子女外向與否，就唔會影響父母是否偏心。 |
|
 |
|
|
研究同時指出，父母嘅偏心行為其實對子女有重大影響，獲得較少父母注意嘅小朋友，長大後嘅心理健康會傾向較差，與家人嘅關係亦會更加疏遠。 研究團體指，佢哋並非建議父母無視子女個別差異而強行一視同仁，亦承認父母對於不同子女嘅照顧方法係會有唔同。但就希望研究能夠為父母帶來啟發，以更開放、誠實嘅心態留意一下家庭中可能存在嘅偏心行為，令子女即使待遇不同，但一樣可以健康、合適地成長。 |
|