|
「靚仔無本心」呢句嘢相信大家聽唔少，而過去眾多嘅兩性關係研究中，都發現女性自稱揀老公（或長久關係伴侶）時係傾向揀有智慧、有資源嘅男性而非以貌取人。不過美國近日嘅一個新研究，就發現女人口講係一套，到實際真係要揀嘅時候，其實都係會揀靚仔。更重要嘅係，連女性嘅父母其實都口不對心，一樣叫個女揀靚仔！ 美國東麻省州立大學心理學系嘅Madeleine A. Fugère與其團隊近日公佈咗一個新研究。佢哋指出父母嘅意見至今仍然會影響女性於選擇長久伴侶時嘅行為，而又因為過往研究指出，父母及女性都自稱認為擁有智慧（更有機會能帶來資源）係更好嘅男性特質，所以佢哋就想測試下佢哋係真係會有相應嘅行為（女性揀畀自己，父母揀畀個女）。 |
|
 |
|
|
於是佢哋搵黎201位女兒及佢哋嘅187名父母，先要求佢哋回答問卷以再次確定佢哋的確推崇有智慧嘅男性而非靚仔。另一邊廂就搵黎「靚仔」及「唔靚仔」嘅兩張男性照片，並分別配上「有智慧」及「冇智慧」特性（即總共有4個組合），並向女兒及父母先展示共中一張（例如靚仔無智慧）、要求佢哋評價相中人長為長期伴侶嘅外貌、智慧及吸引力。 然後研究團隊就會出示另一張擁有完全相反特質嘅男性照片（唔靚仔有智慧），並要求受訪者於兩張相中揀一個做自己嘅長期伴侶（父母就揀畀個女），並要寫低選擇理由。 |
|
 |
|
|
結果就發現，超過七成（72.6%）嘅女兒，以及過半嘅父母（59.6%）最後都係會無視智慧差別，揀靚仔嗰個。而女兒及父母雖然大致上（73.8%）認同對方嘅決定，但女兒更傾向選擇「靚仔無智慧」嘅男性，相對之下父母則會較傾向選擇「唔靚仔有智慧」，顯示父母更傾向女兒搵個長期穩定又有資源嘅另一半。 研究總結指出，女性選擇另一半時，男性外貌吸引力嘅影響可能比起女性自己認知嘅更大。同時亦發現女兒及父母於此事上嘅分歧比預計中少。 |
|