任天堂於上週推出自家情報App「Nintendo Today」，隨即就於App中公佈《薩爾達傳說》真人版電影嘅上映日期等情報。後續仲吸引到著名記者Daniel Richtman爆料，指任天堂唔係開發緊一部，而係三部《薩爾達傳說》真人版電影，前後將用六年時間製作及上映。

話說上週四任天堂推出「Nintendo Today」App之後，翌日就於App上公佈咗《薩爾達傳說》真人版電影嘅上映日期定於2027年3月26日，亦即係整整兩年之後先會上映。雖然未公開演員陣容及故事大綱，但目前坊間估計電影會跟隨《薩爾達傳說》嘅傳統，即係林克實現佢作為海拉魯英雄嘅使用，尋找三角神力拯救薩爾達公主，同時打敗大魔王加儂。

而於上述情報見街之後，Daniel Richtman亦於其Patreon中跟進報導。佢指出，2027年3月26日上映嘅呢部《薩爾達傳說》，將有可能係電影三部曲嘅第一部。而如果真係發展成三部曲，則將會係一個6年計劃，所有重要演員嘅合約都會包含整段時間，唔需要擔心中途換角。

《薩爾達傳說》真人版電影將繼續Sony負責，「瑪利奧之父」宮本茂及曾為Sony監製過N部漫畫、遊戲改篇電影，包括所有蜘蛛俠電影嘅Avi Arad聯手監製。導演則係《The Maze Runner》系列，以及去年上映嘅《Kingdom of the Planet of the Apes》（猿人爭霸戰：猩凶帝國）導演Wes Ball。

資料來源：Gamerant