（劇透警告！）

改編自同名遊戲嘅HBO《The Last of Us》第二季早前開播，正當大家以為製作人不停話「太多嘢要講要拍到第三季」代表深受大家喜愛嘅Joel（Pedro Pascal飾）能夠陪大家多一陣時，著名嘅「喬爾夫球」劇情卻於第二季第二集「如期以至」，震撼觀眾之餘亦令第二季評分暴跌。但另一邊廂，Pedro Pascal接受媒體訪問時就笑談「喬爾夫球」拍攝經過，仲話「我要開始打高爾夫啦」。

為防有人對《The Last of Us》劇情唔太熟悉，所以先讓我簡單講述一下背景知識。《The Last of Us》劇集第二季主要採用遊戲第二集《The Last of Us 2》嘅劇情改編而成。而遊戲中最受爭論嘅一點，在於深受大家喜愛嘅上集主角「喬爾（Joel）」（劇集中由Pedro Pascal飾演）於故事早段救咗新角色Abby（劇集中由Kaitlyn Dever飾演）後，被對方以槍制服再用高爾夫球棍爆頭而死（玩家將此戲稱為「喬爾夫球」）。縱然Abby有充份嘅理由（佢爸爸於上集/上季被Joel殺死），但由於Joel死得太過突然而且窩囊而引發玩家不滿。後續更引發一連串針對遊戲當中嘅DEI（多元、平等、包容）內容嘅批評。

而黎到劇集，雖然大家都有哂心理準備「喬爾夫球」劇情會繼續出現，但Joel於第二集早早領便當依然令人感到驚訝，唔少人更湧入Rotten Tomatoes網站留下負評。

《The Last of Us》第二季目前評分

但「當事人」Pedro Pascal似乎就相當輕鬆。早前佢接受《Entertainment Weekly》訪問時提到拍攝「喬爾夫球」時嘅經過，表示自己經過第一季後，與劇集台前幕後都建立起深厚感情，所以拍攝角色死亡劇情時不免有啲傷感。但佢同時亦自嘲過去飾演嘅角色經常會被殺，「我成日死㗎啦。我鍾意死。」

而由於都係「被暴力爆頭」而死，所以訪問中亦提到佢於《Game of Throne》中飾演嘅Oberyn Martell一角，仲被問到佢鍾意邊個角色嘅死法多啲。對此Pedro Pascal嘅回答係：「咁我覺得呢個（Joel）最好…唔係喎，可能有得爭喎，應該有。我鍾意高爾夫球棍，我諗我要開始打高爾夫啦。」

資料來源：winteriscoming.net