|
HBO改編Naughty Dog同名電玩嘅真人劇集《The Last of Us》第二季早於上月播完。雖然媒體對於第二季嘅評分依然高企，觀眾評分一開始亦唔錯，但自從Pedro Pascal飾演嘅「Joel」（喬爾）被Kaitlyn Dever飾演嘅新角色Abby「喬爾夫球」後，評價就開始滑落。而近日身兼遊戲兼劇集創作人、唔少玩家心目中「惡名昭彰」嘅Neil Druckmann就提到「喬爾夫球」呢個不論於遊戲同劇集都充滿爭議嘅情節，仲多謝HBO「接受呢啲爭議性決定」。 |
|
 圖片：IMDB |
|
|
Neil Druckmann近日與另一主創Craig Mazin、飾演Ellie嘅Bella Ramsey、飾演Abby嘅Kaitlyn Dever等人一同出席艾美獎座談會，並一同欣賞劇集第二季第二集，亦即發生「喬爾夫球」事件一集嘅開頭。或者就因為咁，Neil Druckmann有感而發地提到過去其實多次嘗試將《The Last of Us》改編成劇集，但都未能成功，並認為「我諗，最終黎到同HBO合作係一件好事，黎到一個傾向呢啲具爭議性決定嘅地方…就算到依家，我都唔敢相信佢哋畀我哋咁樣組織故事。」 比起《The Last of Us Part II》遊戲推出時，強勢反駁不滿「喬爾夫球」事件的玩家之時，Neil Druckmann嘅態度似乎係有所軟化，至少終於理解劇情未必獲得大多玩家或觀眾接受。但同時佢亦繼續強調：「呢啲決定都係故事需要」、「我相信呢啲就係令到故事特別嘅原因。」 |
|
 圖片：IMDB |
|
|
隨後佢就爆料另一個「爭議性決定」：「好似我哋啱啱完咗第二季，而第三季嘅主要演員就係——劇透警告——Kaitlyn。」 事實上對於玩過《The Last of Us Part II》嘅玩家而言，第三季會由Kaitlyn飾演嘅Abby做主角完全係預期之中。畢竟當年遊戲推出時嘅另一最被詬病嘅，就係要於「喬爾夫球」事件後被逼操作引起玩家反感嘅Abby繼續遊戲，甚至要與原本嘅主角Ellie為敵，令玩家心理難以平衡。而過去嘅劇集大致上都係跟隨遊戲發展，未有重大改動，所以會以Abby做主角亦非常合理。 但又話分兩頭，或者係因為Kaitlyn Dever比起遊戲中嘅Abby順眼得多，所以即使觀眾對於失去Joel感到痛心，但似乎又冇咩人針對Abby呢個角色。反而係飾演Ellie嘅Bella Ramsey就受到唔少外貌批評。所以話唔定，第三季口碑反而會有所提升？ |
|