由Scarlett Johansson主演嘅《侏羅紀世界：重生（Jurassic World: Rebirth）》上周於全球各地陸續上映。雖然已經係「侏羅紀」系列第7部作品，但號召力依然強勁，首周全球票房已經衝破3.18億美元！Scarlett Johansson亦因此而榮升為影史上「最高票房演員」，所參演過嘅作品累計票房超過148億美元。

為配合美國國慶日連假，《侏羅紀世界：重生》於上周三提前上映（一般電影通常係周五上映）。據票房統計網站《Box Mojo Office》數據，電影在北美開畫5天票房為1.473億美元，而海外市場票房則為1.71億美元，全球首周合共進帳3.183億美元，遠超業界原先估計嘅2.6億美元。不過，電影評價卻褒貶不一，目前在影評網站「爛番茄（Rotten Tomatoes)」上分別獲得52％新鮮度及72％影迷評分，即係專業影評人覺得麻麻，但觀眾覺得還可以。負評主要係批評劇情空洞、欠缺新意；而正面評價就認為動作場面夠刺激，Scarlett Johansson嘅演出尤其出色。

隨住電影大賣，Scarlett Johansson參演過嘅電影總票房亦突破148億美元，成功超越Samuel L. Jackson（146億美元）及Robert Downey Jr.（143億美元）紀錄，成為影史上「最高票房演員」。值得一提嘅係，當中超過87億美元都係嚟自4部《復仇者聯盟》電影以及《美國隊長3：英雄內戰》，MCU嘅貢獻可謂功不可沒。

據報導指，《侏羅紀世界：重生》製作成本約1.8億美元，票房只要達到4.5億美元左右就能收支平衡。按照目前趨勢，呢部電影可以話係穩賺不賠。如果成績理想，話唔定環球影業會以呢部電影為起點，製作一套全新三部曲。