想當年大家睇住橋本環奈憑著「奇蹟的一杖」成為「千年一遇美少女」而爆紅，估唔到話咁快佢就已經長大到要談婚論嫁嘅年紀。據日本雜誌報導，環奈BB已經接受拍拖三年嘅男友中川大志求婚，二人不但連家長都見埋而且已經同居。換言之早兩個月話分手都只係煙幕黎！

圖片：kannahashimoto.mg & taishi_nakagawa_official

據日本《女性Seven》引述「知情人士」表示，雖然今年5月時曾有傳聞指二人因中川大志求婚失敗而分手，但實際上當時環奈BB係感動到喊哂口咁答應。近月二人感情發展相當順利，唔單止已經於環奈BB名下嘅3億日元家中同居同四隻愛犬，仲已經見埋家長開始安排婚禮事宜。換言之早前傳出分手可能只係為咗爭取籌備婚禮空間嘅煙幕。

報導指環奈BB與中川大志於2022年電影《黑夜遊行》（ブラックナイトパレード）合作時相識，因為兩個人都鍾意養狗同飲酒而令感情火速升溫，同年環奈BB就已經被記者拍到於中川大志屋企過夜。而即使近年二人工作繁忙，亦會儘量擠出時間相處，同時二人亦非常有默契地輪流照顧雙方嘅愛犬。即使傳出分手之後，6月時二人亦被拍到與共同好友仲里依紗及其他友人聚餐，中川大志更係推住BB車帶埋外甥出席，非常有住家男人感覺。

資料來源：女性Seven