曾製作《壯志凌雲》及《魔盜王》系列嘅金牌監製Jerry Bruckheimer透露，佢已經同Johnny Depp商討過回歸《魔盜王6》嘅可能性，認為只要劇本啱JD心水，佢就會再次飾演積克船長。

Johnny Depp與Jerry Bruckheimer

Jerry Bruckheimer近年多次提到，迪士尼正計劃重啟《魔盜王》系列，意味會採用全新演員陣容開啟新篇章，再邀請部份舊班底回歸客串一下。但大家都非常清楚，如果《魔盜王6》冇「積克船長」Johnny Depp呢位靈魂人物，票房號召力一定會大打折扣，而Jerry Bruckheimer亦都知道呢一點，只可惜唔輪到佢話事。佢喺去年5月接受訪問曾表示：「如果一切都由我決定嘅話，JD將會參與其中。我愛佢，佢係一個好朋友，一位出色嘅藝術家，並創造咗積克船長呢個角色。」

事隔一年多，Jerry Bruckheimer日前接受《Entertainment Weekly》訪問時就再透露，佢已經同Johnny Depp商討過回歸《魔盜王6》嘅可能性，並對佢會否回歸抱樂觀態度：「如果劇本嘅寫法啱佢心意，我相信佢會接演。大家都知道，一切取決於劇本嘅內容。」與此同時，佢仲提到團隊已經急不及待開拍，雖然劇本尚未完全定稿，仍然雕琢當中，但已經好接近理想版本。

但講到尾，就算劇本再好、迪士尼高層又開埋綠燈，最終都係要睇JD本人意願先能夠成事，否則一切都只係Jerry Bruckheimer嘅一廂情願。大家唔好忘記，當年Johnny Depp深陷同Amber Heard嘅官司爭議時，迪士尼同佢火速割席。2022年JD更喺庭上親口承認，就算迪士尼「拎住3億美元同100萬隻羊駝」送上門，佢都唔會回歸出演《魔盜王》系列。事關佢為「積克船長」呢個角色投放咗無數心血，又同迪士尼合作咗咁多年，點知對方未審先判就急住同佢劃清界線，令佢覺得被深深背叛。