由Sydney Sweeney主演嘅犯罪驚悚片《Americana》上周五在美國正式上映，但開畫票房成績卻慘不忍睹，據報上映首3日僅收50萬美元。對此，有人就認為失利原因可能同Sydney Sweeney嘅牛仔褲廣告爭議有關。

上月同大家報導過，著名服裝品牌American Eagle邀請到Sydney Sweeney拍廣告，為品牌宣傳秋季牛仔服飾系列，卻因廣告宣傳口號「Sydney Sweeney Has Great Jeans」大玩食字，巧妙咁利用「jeans」（牛仔褲）同「genes」（基因）嘅諧音作賣點，加上Sydney Sweeney本身金髮碧眼嘅形象，結果被批評涉嫌宣揚白人至上主義。其後有傳媒爆料指Sydney Sweeny係已註冊共和黨選民，同屬共和黨嘅美國總統Donald Trump仲公開力撐廣告，令爭議越鬧越大並增添幾分政治色彩。

講返電影本身，《Americana》由Tony Tost執導同編劇，Sydney Sweeney、Paul Walter Hauser、Halsey聯手主演。故事講述南達科他州一個小鎮，因為一件「拉科塔人幽靈襯衫」（美國原住民拉科塔人進行宗教儀式時所穿嘅衣服）出現在黑市上，繼而引發一連串暴力衝突。電影早於2023年西南偏南電影節（SXSW 2023）首映，並在當時獲得唔錯嘅評價（目前爛番茄評分已跌至68％新鮮度），但直到上星期先喺美國1,123間戲院正式上映。點知開畫成績如上面所講，開畫首周末3天僅收50萬美元票房，除返開嘅話即係平均每間戲院僅進帳445美元，成績可謂相當慘淡。

有唔少人將票房失利歸咎在Sydney Sweeney嘅廣告爭議，導致大批觀眾拒絕入場。不過，亦有業內人士指出，《Americana》本身就係一部低成本獨立電影，唔似得其他大片咁大肆宣傳，上映嘅戲院數量亦唔多，票房低並唔出奇。再加上片商獅門影業其後會將電影放到串流平台，所以票房低唔一定會蝕，最終可能仲有錢賺。