巴裔美國演員兼棟篤笑表演者Kumail Nanjiani日前在Podcast節目透露，當年佢答應出演《永恆族（Eternals）》超級英雄「金戈（Kingo）」時，就同Marvel簽咗6部電影合約，並以為會係自己未來10年嘅事業重心。點知電影上映後口碑同票房都未如理想，一切計劃化作泡影，仲令到佢情緒崩潰要尋求心理治療協助。

最近Kumail Nanjiani在Podcast節目《Working It Out》透露，佢喺Marvel嘅經歷會成為佢即將推出嘅棟篤笑節目一大主題：「我會提到自己參演一部大片嘅經歷。因為疫情關係，我喺屋企等咗一年半，一直都好期望呢部電影上映，仲覺得『呢部戲上映後肯定會爆！』但結果電影正式上映後，評價好差、票房又慘淡，搞到我情緒崩潰，嗰刻我先意識到自己要尋求心治療協助。」

Kumail Nanjiani指緊嘅正正係2021年上映嘅《永恆族》，佢仲話原本以為自己會喺MCU有好大參與，結果乜都冇發生：「我當時心諗『嘩，呢個將會係我未來十年嘅工作！』我簽咗6部電影合約，仲有電子遊戲同主題樂園設施嘅合約，佢哋要求我要簽晒呢堆嘢。當時我以為未來10年嘅生活，就係每年都會拍Marvel電影，然後有空檔就做下自己想做嘅小項目，但結果全部都冇發生。」

由奧斯卡金像導演趙婷執導嘅《永恆族》在2021年11月上映，曾一度成為影評網站Rotten Tomatoe史上評分最低嘅MCU電影，僅獲47%新鮮度（目前已被2023年上映嘅《蟻俠3》取代），而且票房表現亦唔理想，製作成本高達2億美元，但全球只收得4.02億美元票房。自此之後，Kumail Nanjiani飾演嘅「金戈」同其他永恆族角色就冇再喺MCU作品出現。雖然正在拍攝中嘅MCU大作《Avengers: Doomsday》，集結了初代X-Men、新舊復仇者、神奇4俠等大量英雄，但完全冇消息提到永恆族角色會加入，甚至連傳聞都冇。究竟永恆族會唔會再喺MCU出現？真係一個大問號。