有栖同宇佐木將再次重返「今際之國」，挑戰更兇險嘅死亡遊戲，唔知佢哋今次能否成功逃出生天呢？9月25日正式播出！

《今際之國的有栖》第3季將延續上季劇情，講述有栖同宇佐木成功通關所有遊戲後，回到現實世界後結為夫妻，過住幸福快樂嘅生活。雖然兩人失憶唔記得晒「今際之國」發生嘅事，但周不時都會夢到今際之國嘅畫面。直到某日，宇佐木被一位名為隆二（賀來賢人 飾）嘅「來世研究者」帶領下突然人間蒸發，與此同時，盤田（磯村勇斗 飾）出現喺有栖面前，表示宇佐木已經回到今際之國，並將最後一張「JOKER」卡牌交畀有栖。為拯救宇佐木，有栖決定重返今際之國迎接更兇險嘅死亡遊戲挑戰。

官方表示，今季嘅遊戲場面將會係歷來最震撼，超越之前嘅季度。其中飾演有栖嘅山崎賢人特別提到，有一場在夜間神社舉行嘅遊戲，會有無數燃燒中嘅箭矢從天而降，視覺效果極具衝擊力：「我當初睇漫畫嗰陣，就已經被火術雨震撼到，所以當我收呢場戲嘅劇本時，不禁心諗『終於嚟喇！』」另外，佢仲提到今季佢同土屋太鳳飾演嘅宇佐木會被迫分開，分配到唔同隊伍進行遊戲。

順帶一提，雖然今季係原創劇本，但如果有睇原著漫畫嘅朋友可能會發現，預告中某啲遊戲其實在漫畫早期出現過，如今嚟到第三季終於能夠以真人版形式呈現。

除咗山崎賢人、土屋太鳳、三吉彩花、磯村勇斗、每熊克哉等人會回歸，今次更加入大倉孝二、須藤理彩、池内博之、玉城蒂娜、醍醐虎汰朗、玄理、吉柳咲良、三河悠冴、岩永丞威、池田朱那、賀来賢人等多位新面孔。