自月初OpenAI內部宣佈「紅色警誡」，以對抗Google上月底推出嘅Gemini 3.0之後，ChatGPT就頻頻獲得更新。除咗月初推出ChatGPT 5.2版本之外，OpenAI近日又公佈新版圖像影像生成模組「ChatGPT Image 1.5」，提供更仔細、可靠嘅圖像生成及編輯功能，而且生成速度比上版快4倍，明顯就係要與早前Google推出、獲得網上一致讚嘆嘅「Nano Banana」抗衡。

據OpenAI於美國時間16日晚發出嘅新聞稿，「ChatGPT Image 1.5」將於即日起開放予所有用家、以及API使用，最大賣點係比今年4月推出嘅1.0版本於多個方面都更加精確。例如當用家從零生成一張照片、或者指示AI將上傳圖片整合成一張新圖之後，可以作出追加指示要求AI進一步修改，而AI除咗會更準確地跟從指示之外，仲識得將你無話要講嘅地方保留，令最終成品更貼合你想像中嘅模樣。

「ChatGPT Image 1.5」亦可以更可靠地理解用家嘅指示。新聞稿中提出一個例子，指如果用家要求生成一個6格乘6格、每格有指定物品嘅圖片時，舊版本不能準確生成所需圖片，但新版本就可以。此外新版本亦會加強圖片中嘅文字生成能力，換言之生成出黎嘅圖片中嘅文字唔會再係亂碼，而係可讀、合理嘅文字。

除咗功能更新之外，OpenAI亦會於網站及App版嘅側邊欄增設「ChatGPT Image」嘅專區，令大家可以更快、更方便地生成所需圖片。

新版ChatGPT Image可以於保留圖片其他部份不變嘅前提下，進行追加修圖

圖片：OpenAI

而據LMArena嘅最新評分，16日發佈嘅ChatGPT-Image-latest 於圖像編輯能力中以三分力壓Nano Banana升上榜首；而於文字生成圖像能力（Text-to-image）能力中亦以30分超越Nano Banana，似乎代表新版ChatGPT Image 比起Nano Banana更具優勢。不過據報有用家試過後認為新版係「高分低能」，實際上仍然係Nano Banana更好用。

值得一提嘅係，據報今次更新原定係於明年1月先會上架，相信係之前嘅「紅色警誡」令OpenAI趕工提早推出。

資料來源：OpenAI