國際影壇年度盛事「奧斯卡頒獎禮」即將迎來歷史性改革！美國影藝學院（AMPAS）今日宣布，由2029年起，奧斯卡頒獎禮將結束沿用多年嘅電視轉播模式，全面改為YouTube平台免費直播，並會提供多語言聲道及字幕，讓全球影迷都可以更方便參與同見證呢項盛事。

綜合外媒報導，美國影藝學院已同YouTube簽署了一項為期5年嘅合作協議，將奧斯卡金像獎全球獨家轉播權交予YouTube，內容更涵蓋提名名單公布、紅地毯現場直播，以及各類幕後花絮。新協議將由2029年、第101屆奧斯卡開始生效，一直持續至2033年。至於已經轉播奧斯卡超過50年嘅美國廣播公司（ABC），則會繼續播映至2028年，即第100屆奧斯卡後正式結束雙方合作。

據了解，美國影藝學院喺2025年大半時間，一直為奧斯卡頒獎禮物色新嘅播映授權協議，吸引多家傳統電視台及串流平台競逐，其中包括NBC環球及Netflix。消息人士透露，YouTube之所以成功跑出，除咗因為開出超過「9位數」美元天價，力壓ABC（迪士尼）同NBC環球提出嘅「8位數」美元報價。其次係影藝學院同ABC（迪士尼）過往同不時在製作方向出現分歧，包括節目長度、頒發咩獎、由節目主持安排等。轉到YouTube呢類幾乎沒有時限嘅串流平台後，奧斯卡節目長短將不再受制於電視編排，影藝學院亦可以更大程度掌握節目內容。消息人士更表示：「佢哋想點搞都得。就算搞一個時長6個鐘，由MrBeast主持嘅奧斯卡都得。」

事實上，奧斯卡頒獎禮近年在電視上的收視早已大不如前。即使2022年出現「Will Smith掌摑 Chris Rock」嘅震撼場面，收視亦只得平均1,660萬人，成為史上第二低（最低係受疫情影響嘅2021年）。今年雖然回升至1,810萬觀眾，以近年傳統電視大幅下滑嘅背景嚟講算係唔錯，但同黃金年代相比仍然差好遠，1998年《鐵達尼號》嗰屆收視高達5,700萬人。考慮到越來越多觀眾轉向串流平台觀看影視內容，而YouTube喺美國電視收視佔比更高達13％，甚至超越Netflix（8％），或許今次轉變能為呢項影壇盛事注入更多新活力。