《黑豹2》導演兼編劇Ryan Coogler透露，早在Chadwick Boseman離世之前，佢已經完成咗一份長達180頁嘅劇本初稿。呢個版本嘅故事圍繞T’Challa同佢8歲兒子嘅一段試煉之旅展開，同而家大家見到、以Shuri繼承黑豹衣缽為主軸嘅版本截然不同。

Ryan Coogler與Chadwick Boseman

一直以嚟，唔少Marvel電影迷都好奇，如果Chadwick Boseman仍然在世，《黑豹2》會點樣延續T’Challa嘅故事。最近導演Ryan Coogler接受Podcast節目《Happy Sad Confused》訪問時，就詳細披露了《黑豹2》原劇情構想，故事圍繞T’Challa同佢8歲兒子之間嘅一段冒險旅程展開，而反派就依然係由Tenoch Huerta飾演嘅Namor。

Ryan Coogler透露，原劇本嘅核心設定係一個名為「Ritual of 8（八日儀式）」嘅傳統，當王子年滿8歲，就必需同父親一齊到叢林生活8日。喺呢段期間，王子要完全聽從父親一切吩咐，叫佢做乜就做乜；與此同時，王子可以問父親任何問題，而父親都必須如實回答。然而，儀式進行到一半時，Namor突然發動襲擊，T’Challa一邊要應付一個極度危險嘅敵人，但同時又因為儀式規定，阿仔必須全程跟住佢，寸步不離，否則就會打破一個從未被違反過嘅古老傳統。Coogler形容呢個設定「非常瘋狂」，並認為Chadwick Boseman一定可以演得非常精彩，只可惜人生就係咁無常。

Ryan Coogler又提到，當佢完成咗呢個版本嘅《黑豹2》劇本初稿後，曾經聯繫Chadwick Boseman邀請對方過目，但Chadwick Boseman當時已經病到無法閱讀。Ryan Coogler感慨表示：「佢嗰陣嘅狀態，已經無辦法再睇劇本。我哋嘅關係好微妙，佢對我嚟講好重要，但係直到佢離世後，我先喺佢屋企人口中知道，原來我對佢嚟講都一樣咁重要。呢件事真係令我好崩潰、好難受。（That fucked me up pretty good）我成日喺度諗，佢生前究竟知唔知道，我其實都好重視佢呢？」佢亦補充，自己為呢個版本投放咗大量心血，因為佢覺得已經真正掌握 Chadwick Boseman嘅表演能力同風格：「拍第一集《黑豹》時，我已經畀咗好多挑戰佢，但後來我先發現，原來嗰啲只係皮毛。」

《Kraven the Hunter》

除此之外，Ryan Coogler仲提到其實喺第一集《黑豹》，佢已經有意引入Kraven the Hunter呢個角色，靈感嚟自Christopher Priest創作嘅《黑豹》漫畫版本，入面有一幕係黑豹、Kraven同Ross喺廚房入面大打出手。不過由於Kraven嘅版權係屬於Sony而唔係Disney，所以最終未能成事。其後Sony就自己拍咗套由Aaron Taylor-Johnson主演嘅《Kraven the Hunter》，但上映後無論票房定口碑都表現平平。

資料來源：variety