法國遊戲大廠Ubisoft今日宣布大改組，除咗確定會裁減人手及關閉工作室外，更腰斬6款正在開發中嘅遊戲，包括籌備多年嘅《波斯王子：時之沙》重製版。

Ubisoft創辦人兼行政總裁Yves Guillemot透過聲明表示，隨住3A遊戲開發成本不斷上升，加上市場競爭日益激烈，公司決定全面調整營運模式，轉型成更「以玩家為核心（gamer-centric）」嘅組織。雖然短期內（2026、2027 財年）公司表現可能受到影響，但深相信今次改革有助建立更專注、更高效率、可持續嘅發展架構，為未來增長打好基礎。

Ubisoft將原本冗長嘅開發結構拆分為五個專責部門「Creative Houses」（下稱CH），每個部門專攻特定類型遊戲，由開發到賣街一手包辦，並自負盈虧。

CH1（ Vantage Studios）： 集中火力搞大IP，目標係將《Assassin’s Creed》、《Far Cry》同《Rainbow Six》等著名IP變成「每年吸金十億美元」嘅大品牌。

CH2：專攻競技同合作射擊遊戲，包括《The Division》、《Ghost Recon》、《Splinter Cell》等。

CH3：負責營運「長期營運服務型遊戲（Live experiences）」，《For Honor》、《The Crew》、《Skull & Bones》。

CH4：主打沉浸式幻想世界同劇情作品，品牌包括《Anno》、《Rayman》同《Prince of Persia》系列。

CH5：重振休閒同家庭遊戲市場，例如《Just Dance》同埋一系列手機遊戲。

至於「止血」措施方面，Ubisoft確定會取消6款遊戲開發，除咗《波斯王子：時之沙》重製版，仲有4款未曾對外公布嘅作品及1款手遊。官方解釋，相關作品因為未能符合公司最新訂立嘅品質及策略標準，所以決定停止投資。同時，為咗提高其餘作品品質，另有7款未公開嘅遊戲將延長開發時間。

人事與工作安排方面，Ubisoft暫未有透露實際裁員人數，但已確認會關閉位於加拿大哈利法斯及瑞典斯德哥爾摩的兩間工作室。另外，亦決定取消原有的彈性工作制度，要求員工每星期必須返足5日Office，每年只會提供少量WFH配額。

UBISOFT - Call for strike

值得一提嘅係，改革消息公布後，法國遊戲產業工會Solidaires Informatique隨即發起半日罷工抗議，批評Ubisoft管理層決策荒謬，並提出三大訴求，包括立即停止削減成本計劃、維持甚至擴大遙距工作安排，以及為來年提供合理且有尊嚴嘅加薪幅度。工會強調：「我哋絕對唔會容許老闆肆意妄為，摧毀我哋嘅工作條件。或者係時候提醒佢，真正製作遊戲嘅，係佢嘅員工。」