相信對於大部份觀眾嚟講，提起《攻殼機動隊》，腦海浮現嘅通常都係1995年押井守電影版嘅畫面，主角草薙素子形象高冷虛無，彷彿係一個被困在完美軀殼中嘅孤獨靈魂。不過，今次由Science SARU製作嘅全新動畫，似乎要走出呢種沉鬱風格！官方今日正式確認，新作將於今年7月播出，並同步公開首條宣傳影片(PV)及視覺圖，帶領觀眾重返士郎正宗原作漫畫，嗰個充滿活力同科技設定嘅獨特世界。

今次新版動畫定名為《攻殼機動隊 THE GHOST IN THE SHELL》，由曾製作《膽大黨》嘅工作室Science SARU負責，Moko-chan出任導演，圓城塔負責系列構成與分集劇本，角色設計及總作畫監督則由半田修平擔任。從官方公開嘅PV同視覺圖可見，今次無論係線條嘅運用、色彩配搭，抑或素子嗰對更有神采嘅眼睛，都明顯更貼近士郎正宗漫畫版嘅風格。對漫畫原作黨嚟講，絕對係一大喜訊。

《攻殼機動隊》由士郎正宗於1989年創作，故事設定在2040年代虛構日本城市「新濱市」，講述經歷第三及第四次世界大戰洗禮後，人類科技突飛猛進，除咗大腦以外嘅器官都可以以電子義體取代，而大腦亦可以改裝成能夠連接網絡嘅電子腦。雖然全身義體化令生活變得更加便利，但同時催生出各式各樣嘅電子犯罪，於是政府成立了「公安九課」（亦即係攻殼機動隊），專門負責應對各種新型態嘅犯罪威脅。