經歷數次「宣布發售日」然後又「宣布延期」嘅期望落空後，唔少機迷對《GTA 6》嘅心情早已由當初嘅極度期待，慢慢變成無奈，甚至轉化成一種「緣份到了，自然有得玩」嘅佛系心態。不過，Rockstar母公司Take-Two Interactive近日就再派定心丸，重申《GTA 6》將維持今年11月19日發售，而且數位及實體版會同步上市，宣傳活動亦將於夏天正式展開。

據《IGN》報導，Take-Two喺最新公布嘅財報中再次重申，《GTA 6》依然鎖定今年11月19日發售，並預告宣傳活動將於今年夏天展開，意味大家期待已久嘅全新預告片、實機遊玩畫面，好有可能會喺未來幾個月內就會陸續見街，為呢款年尾超級大作造勢。而被問到對而家發售日期有咩感受時，Take-Two CEO Strauss Zelnick直言「感覺非常良好」仲話：「當你愈嚟愈接近宣傳期，你嘅信心水平好自然會達到最高點。」

除此之外，Strauss Zelnick在接受《Variety》訪問時，亦親自打破「首發只有數位版」嘅傳聞。早前有傳聞指，官方為防止遊戲「偷跑」，首發可能只有數位版，實體碟光碟會延遲推出，甚至要等到2027年先賣街。對此Strauss Zelnick直接否認：「這不在計劃之內（That's not the plan）」，確認數位及實體版會同步上架。既然CEO都開到口話唔會延期又會同步出碟，大家個心係咪定少少，同時重新燃起對《GTA 6》嘅期待呢？