《倚天屠龍記》中有「五大派圍攻光明頂」，而過去嘅農歷年間，電影圈亦上映一套「五大片商圍攻字節跳動」。話說字節跳動於上週推出可以生成出極為像真嘅電影片段嘅AI影片生成工具Seedance 2.0，但正正係因為生成出黎嘅影片太像真，，結果荷里活片商紛紛出律師信警告字節跳動侵權。而隨住Sony於週三加入戰團，荷里活五大廠都已經向字節跳動作出行動，唔知字節跳動又搵唔搵到自己嘅張無忌黎解圍呢？

上週 Seedance 2.0 正式曝光之後，就因為生成嘅影片內容明顯大量盜用版權 IP，包括各大片廠嘅電影、劇集角色等而引起爭議。Disney 同 Paramount隨即作出反應，率先向字節跳動發出停止信（Cease and Desist Letter）要求停止侵權行為。隨後Warner Bros. 同 Netflix 亦相繼向字節跳動發出律師信。到週三時 Sony 亦正式入局，五大片廠已全部表態。

Sony Pictures 法務部門執行副總裁兼總法律顧問在信中措詞相當強硬，直接指明：「Seedance 2.0 明顯係未經授權、全面以 Sony 版權作品訓練出嚟」，仲指該工具生成嘅影片內容直接模仿 Sony 嘅內容，甚至複製當中受版權保護的角色同元素。Sony 更明確點名，要求 字節跳動立即停止生成任何侵犯 Sony 版權嘅內容，同時刪除訓練 Seedance 2.0 時用過嘅所有 Sony 版權素材——包括已授權或提供俾第三方使用嘅版本。

Seedance 2.0生成嘅影片

事實上於Disney及Paramount發出律師信之後，字節跳動方面曾經回應指明白大家嘅憂慮，並會加強現有嘅版權保護措施。但Sony於信中就完全唔收貨，指責字節跳動「蓄意選擇喺未有適當版權保護機制嘅情況下發布 Seedance 2.0，呢個行為已說明一切」，亦強調「唔會容忍任何拖延或半桶水嘅應對措施。」

而除咗五大片商之外，由荷里活七大片商（上面五間再加Universal及Amazon Prime）組成嘅美國電影協會，以及有演員工會（SAG-AFTRA）及導演工作支持嘅「人類藝術運動」（Human Artistry Campaign）亦有譴責Seedance 2.0及字節跳動。

資料來源：Deadline