去戲院買飛揀位，本來係一件先到先得嘅事。但美國最大連鎖戲院AMC宣佈，今年稍後起，旗下所有影院嘅最佳座位將會率先預留俾付費會員，普通散客要坐好位？對唔住，要等到人哋揀剩先論到你呀！

據《Deadline》報導，AMC行政總裁Adam Aron喺最新一次業績發布會上正式宣佈，AMC將推出「優先首選座位」（Preferred Premier Seating）制度，旗下院廳嘅最佳位置將率先開放俾A-List同Stubs Premiere兩個付費會員層級預訂。呢兩個級別嘅會員可以喺公眾售票前優先預訂靚位，而且撇除會員月費之外，呢項服務本身唔需要額外收費，會員仍然只需付正常票價即可。

A-List同Stubs Premiere係AMC目前已經有嘅會員層級。A-List採用月費制，根據所在地區收費由19.99美元至27.99美元不等，本身嘅賣點在於每個星期包四張電影飛，即係一個月可以免費睇十六套戲，適合重度電影迷。而一年17.99美金嘅Stus Premiere就同普通會員制差唔多，可以儲下分、買爆谷汽水會自動升級、入場有另一條隊排咁。

Adam Aron形容今次安排係：「確保影院內最好嘅座位，優先預留俾我哋最好嘅顧客。」聽落好合理，但批評聲音亦隨即而來。不少網民認為呢做法跟航空公司係同一套路——先有免費行李，後有收費行李；先有自由選座，後有「靚位要錢」。唔知繼續咁發展落去，將來會唔會出現啲位又唔舒服又唔畀食嘢嘅「廉院」呢？

不過喺AMC嘅角度，推出類似嘅制度似乎又幾合理。事實上，AMC長年背負沉重債務，加上近年串流平台大行其道，戲院入座率持續低落，收入就成為問題。而做得會員嘅一定係經常入場嘅核心顧客，咁照顧好佢哋、等佢哋更心甘情願繼續畀月費，同時又試下吸引其他人為咗揀位而做會員，都講得過去呀？

資料來源：Deadline