2024年上映嘅《異形：羅穆盧斯（Alien: Romulus）》叫好又叫座，全球狂收3.5億美元票房，片商自然唔會放過呢個機會，同年已火速宣布會推出續集。不過原導演Fede Alvarez早前就表示唔會回歸執導，最近有消息指，曾操刀《無聲絕境外傳：首襲日（A Quiet Place: Day One）》嘅Michael Sarnoski有望接棒。

據外媒《Nexus Point News》獨家報導，雖然《異形：羅穆盧斯》編劇兼導演Fede Alvarez已經完成續集劇本，但佢喺去年9月接受《TooFab》訪問時突然表示自己唔會督自執導，而係退居幕後同大導Ridley Scott一齊做監製，仲話正物色緊新導演接手。而目前片商嘅熱門接班人選，就係曾執導《豬殺令》同《無聲絕境外傳：首襲日》嘅Michael Sarnoski。值得一提嘅係，佢曾公開表示《無聲絕境外傳》嘅靈感正正來自《異形》系列，睇嚟佢同呢個IP都幾有緣分。

至於點解Fede Alvare籌備咗近一年、連劇本都寫好，但最終唔親自執導？據知名爆料人Jeff Sneider透露，雖然表面上係和平交接，但背後其實涉及佢同監製Ridley Scott之間嘅「創意分歧」。據指Fede Alvare原本打算喺續集帶回由Michael Fassbender飾演嘅生化人「David」，但作為系列揸Fit人嘅Ridley Scott就極力反對，認為「David」應該留返俾自己未來執導嘅《異形》電影先使用，結果雙方意見不合，最終導致Fede Alvarez退出導演一職。

不過，就算片商真係落實搵Michael Sarnoski接棒，佢嘅檔期亦非常爆滿。佢目前正忙於製作由Hugh Jackman主演嘅新片《The Death of Robin Hood》（預計2026年6月上映），之後仲已經簽約執導小島秀夫人氣遊戲《Death Stranding（死亡擱淺）》嘅真人版電影。究竟佢抽唔抽到時間接手異形呢個大熱IP，目前仍然有待觀察。