唔少人可能都擔心緊AI會搞到自己無咗份工，但其實呢個只係「個體嘅不幸」，事實上AI對於人類整體嘅影響比你想像中都仲要大——例如真係可能會導致人類滅絕。而且唔使做啲咩好科幻嘅事㗎咋，只需要生成出比真人更吸引嘅裸體就可以啦！

圖片：Amazon

圖片：projecthub.arduino.cc

話說隨住人類科技發展，「視覺性內容」（Visual Sexual Material，即係J圖）亦變得越黎越多樣，隨住AI生成技術越黎越好，甚至真係做到以假亂真。而為咗理解人類對於各種「視覺性內容」嘅觀感，捷克國家精神健康研究所早前就進行咗個研究，佢哋先搵黎「真人照片」、「電腦CG模型」、「AI生成圖像」、「整容女性」、「矽膠性愛人偶」以及「日本Hentai動漫」共六種裸體女性圖片，然後要求近650名報稱鍾意女性嘅受訪者（當中絕大部份係男性）去為呢六個類別嘅裸女圖，就「真實感」、「性吸引力」、「美感」及「愉悅感」評分，從而得知邊個類別嘅圖最為吸引。

結果就發現，雖然「真人照片」於「真實性」評分中排第一，「AI生成圖像」只排第二，但後者嘅「性吸引力」、「美感」及「愉悅感」評分均反超前者。亦即係話大家都知「AI生成圖像」係無咁真，但比起「真人照片」就係更加「正」！

圖片：Pixabay

值得一提嘅係，「整容女性」嘅「真實性」評只排第四，輸咗畀「電腦CG模型」，而且「美感」及「愉悅感」評分更加全場墊底，似乎證明「後天加功」比起「直頭係假」更加令人抗拒。同時年輕受訪者對於「日本Hentai動漫」嘅接受程度亦遠比年長者要高，顯示從小接觸相應材料的確會影響人嘅審美及喜好。

而呢個亦正正可能係導致「人類滅絕」嘅問題所在：試想像下你青春期時唔再係睇真人J圖、AV，而係睇由AI生成，無論身材外貌甚至性格都能完全符合你喜好嘅成人內容，咁到你長大後仲會唔會對「真實但無咁完美」嘅真人女性咁有興趣？你仲會唔會花咁多心機去追女仔、拍拖結婚生仔？如果呢個情況普遍出現，就可能成為人類存亡嘅最大危機啦。

資料來源：Subjective Responses of Gynephilic Men and Women to Real versus Artificial Female Nudes