由Ryan Gosling主演、改編自《The Martian（火星任務）》原作者Andy Weir另一部小說嘅《Project Hail Mary（末日聖母號）》上周於全球各地正式上映。電影不負眾望，開畫首周末喺全球狂收1.4億美元票房，唔單止超越《Scream 7（奪命狂呼7）》成為今年最高開畫票房電影，仲打破埋Amazon MGM嘅歷史紀錄，為片商打下一支極大嘅強心針！

據票房統計資料顯示，《末日聖母號》喺北美市場開畫首三日勁收8,050萬美元，而海外82個市場亦貢獻咗6,040萬美元，全球總票房合計高達1.4億美元。呢個成績成功擊敗2023年《Creed III（洛奇系列：王者之後3）》嘅1億美元紀錄，成為Amazon MGM史上開畫表現最好嘅作品。而且電影特別受大銀幕觀眾歡迎，IMAX同其他高規格巨幕影院（Premium Large Format）佔咗總票房大約55%，單係IMAX就吸金高達2,760萬美元。

除咗票房亮麗，電影口碑亦好評如潮，目前喺影評網站爛番茄（Rotten Tomatoes）分別獲得95%新鮮度及96%影迷評分，意味專業影評人同一般影迷都一致認為好睇，而且電影喺CinemaScore亦獲得「A」級評價。

據了解，《末日聖母號》製作費高達2億美元，對於近年喺院線屢屢碰壁嘅Amazon MGM嚟講，今次絕對係一場極其重要嘅勝利。事關佢哋早前推出嘅紀錄片《Melania》（成本4,000萬，僅收1,600萬）同R級犯罪片《Crime 101》（成本9,000萬，僅收6,500萬）都雙雙仆直收場，今次終於靠Ryan Gosling成功挽回頹勢。

有分析指，喺現今荷里活續集同超級英雄片當道嘅年代，《末日聖母號》作為一套非續集、非IP嘅原創科幻電影，能夠取得如此佳績實屬難得，甚至成為繼Christopher Nolan嘅《Oppenheimer（奧本海默）》之後，近十年開畫成績最好嘅原創電影。睇嚟Ryan Gosling嘅魅力加上高質素嘅劇本，成功吸引一眾影迷入戲院捧場。