相信大家對OnlyFans都唔會陌生，甚至可能有課金支持過唔同創作者。呢個主打成人內容嘅訂閱平台，造就咗無數「素人」翻身致富嘅神話。不過，一手將OnlyFans發揚光大嘅幕後老闆Leo Radvinsky，近日傳出因癌症離世嘅消息，終年僅43歲。

綜合外媒報導，OnlyFans發言人於星期一發表聲明證實死訊：「我哋懷住悲痛嘅心情宣布Leo Radvinsky離世。Leo經歷長時間同癌症搏鬥後安詳辭世，佢嘅家人希望喺呢段時間保留私隱。」呢位出生於烏克蘭、喺芝加哥長大嘅富豪一直作風低調，佢喺2018年買入OnlyFans母公司Fenix International Limited後，就將呢個平台發揚光大，佢容許創作者保留高達80%嘅收益，徹底顛覆咗整個成人產業嘅分潤模式，成功吸引大量素人甚至知名女星（如Cardi B、Bella Thorne等）加入，建立起龐大嘅訂閱帝國。

OnlyFans嘅吸金能力相當驚人，據報平台喺2023年淨收入高達13億美元，並向創作者支付咗合共66億美元。而官方去年更一度洽談以約80億美元天價出售公司，當時平台已經坐擁高達3.05億用戶。根據《福布斯》估算，Leo生前淨資產高達47億美元。

Sophie Rain

消息傳出後，唔少靠OnlyFans賺到盆滿缽滿嘅頂級創作者都紛紛悼念。其中喺2023至2025年間狂賺9,500萬美元嘅人氣創作者Sophie Rain就感觸表示：「我都唔知點用言語去表達。呢個男人建立嘅平台改變咗我一生。我以前要靠食物券度日，而家因為呢個平台，令我有能力養起全家。呢份恩情我一世都唔會忘記。」佢坦言如果無OnlyFans，自己可能仲做緊侍應，連交租都成問題。

Piper Rockelle

而另一位頂級創作者Piper Rockelle亦坦言自己仲消化緊呢個消息：「我今年1月先加入平台，但已經徹底改變咗我嘅人生。可以話，我今日擁有嘅一切，都多得佢建立嘅呢個地方…我真係唔知可以講啲咩，淨係想講聲多謝，因為佢創造咗一個畀我呢啲人有機會翻身嘅平台。如果冇佢，我根本唔會有今日嘅自己。」雖然Leo Radvinsky一生低調，但佢所建立嘅「OnlyFans帝國」，確實改變咗無數人嘅命運同互聯網生態。唔知隨住老闆離世，呢個吸金力驚人嘅平台會唔會有咩改變呢？