女孩子每個月都會M到，咪以為M到淨係流吓血咁簡單，M到除了會帶來生理痛，仲會影響情緒。有女朋友的巴打都應該心水清，女友M到期間，會變得容易暴燥，又容易憂鬱，總之非常情緒化，難搞到一個點。最驚係咪呀？最驚係呢個時候條女消埋你嗰啖氣，你又唔識應付先慘呢！

而家就話你知，女友M到時會出現的情緒狀況，跟手教埋你如何接招。

首先，可以將女孩M到時的情緒分為以下幾種狀態：

1.暴怒狀態→持續時間約5分鐘，會有突發性洩憤行為，例如掟嘢
2.煩躁狀態→持續時間不等，會Keep住好炆，對所有事都感到不耐煩，乜到睇唔順眼。
3.憂鬱狀態→持續時間不等，表面好似冇咩嘢，但會Feel到佢心情低落，覺得自卑，嫌自己呢樣嗰樣，諗乜都好負面。
4.脆弱狀態→持續時間不等，呢個情況，小小事都會令佢崩潰，甚至對自己存在的價值都感到懷疑。

遇到以上4種情況，男朋友應該點做呢？

暴怒狀態解決方法︰當你發現女友脾氣暴燥時，唔好旨意可以同佢理性溝通，因為呢個時候，你講乜佢都聽唔入耳，所以只好順著佢嘅意思，就算佢幾無理取鬧都好，巴打都要忍忍忍忍忍，忍完就冇事架喇！

煩躁狀態解決方法︰由於呢個時候，對方仲保有理性，所以可以試著用正面的方式溝通，提出可行的建議及解決方式；但同時要注意佢嘅情緒，如果溝通期間令佢有更大情緒波動，一定要適時調整，安撫返佢。

憂鬱狀態解決方法︰面對呢個狀態的女友，要小心翼翼地關注佢纖細的內心，除了講野要小心用字外，盡量都陪喺佢身邊

脆弱狀態解決方法︰呢個狀態非常難處理，但與其講錯錯多，不如直接用行動關心對方，比如陪著佢、抱著佢，主動話佢知你好愛佢，咁就足夠。