較早前，小編報導過Vans會同日本神臺級藝術家村上隆合作做聯乘系列，大致上，都知道設計上會出咩招數，將以佢最耍家嘅微笑花花圖案做主題，而前幾日，品牌就邀請村上隆先生，正式就今次合作係巴黎嘅Hotel Du Grand Veneur向外界發表。

村上隆先生不嬲都鐘意打親民牌，會上，自己率先做生招牌，身上著住件微笑花花圖案兼頭戴骷髏形狀毛毛帽，留意番隻眼都有微笑花花圖案，鬼死咁cutie行出場，仲即席周圍幫粉絲簽名畫畫，氹得人幾開心，場內仲有啲丟圈圈遊戲，而周圍滿佈花呢花碌圖案，好有生氣。

講番聯乘系列產品，除咗有微笑花花圖案做主題，村上先生仲畫咗佢嘅cutie版自畫像嚟出聯乘版T恤助慶，之前神神秘秘都未有公開過，而其餘產品，如Vans招牌slip on，就如之前提到會有大人細路版本，印上拼有唔同顏色嘅微笑花花圖案，其中一款就係今季大hit嘅白色版本，其餘衝浪板、滑板都會掃上微笑花花圖案，一拼推出。