「撒亞人～生於這個地方～稱呼叫悟空(稱呼叫悟空)～」係，雖然當年嘅《龍珠Z》用「好強嘅氣」拖一集係好賤；係，雖然依家嘅《龍珠超》畫面勁靚之餘悟天仲好得意，但對於一眾老粉絲黎講，始終都係當年嘅電視劇版最有味道。由撤亞人篇打拿迪斯、立巴、比達；再直上娜美星打菲利、變超西；返返地球打人造人再打斯路；之後悟飯接班失敗，悟空翻生再打布歐，真係睇到個名個腦就自動飛哂所有劇情出黎！你話呢啲集體回憶喺邊到搵得返！ 真係有！呢個夏天去堆填區就搵到。 | |
| |
唔係，唔係真係叫你去堆填區！我講緊將軍澳啫！因為由今日起到8月31日，將軍澳東港城會舉行「東港城 x 龍珠Z 《盛夏‧最強對最強》」大型展覽，除咗「悟空and Friends」，仲一次過展出哂《龍珠Z》嘅「四大惡人」添！ 主要展區係東港城一樓展覽場(順手提一提唔係好熟將軍澳嘅Gents，東港城係喺坑口站隔黎，千祈唔好好似文青咁真係去咗將軍澳……)，由地鐵站上行兩步就到。最搶眼嘅當然係頂到上商場頂嘅7米高「神龍」，但由於佢匿咗喺「天下第一武道大會」個場境後面，要影全身相係有啲難度。武道會場景前會有出緊「魔貫光殺炮」嘅魔童，而根據大會消息，喺佢對面嘅應該係出緊龜波氣功嘅超西悟空，但由於文青訪問當日隻悟空未擺好，所以得返魔童自己一個。 | |
| |
| 但之前講到嘅四大惡人，係冇魔童份嘅。因為我指嘅係《龍珠Z》中四個主篇嘅主要敵人，包括「撤亞人篇」嘅柒比達、「娜美星篇」嘅菲利、「人造人篇」嘅斯路、仲有「布歐篇」嘅肥布歐。 | |
比達以「撤亞人篇」造型出場。除咗可以用佢鬥高之外，仲可以坐入太空船內影相。但唔好話我唔提你，隻太空船真係為比達度身訂造，所以自問米九幾高嘅你小心撞親頭。
死過又翻生又死再翻生嘅菲利大王以當年嘅最終型態登場。隻左手嘅擺法係非常適合你塞個頭入去影相。
| |
| 有得睇，最好又有得玩。所以喺「武道會」場景內設有「4D龍珠必殺技體感遊戲專區」，等你喺互動螢幕前使出「蝦咩蝦咩蝦」或者「元氣彈」，大約就同年頭喺東京街頭搞過嘅差唔多。由於訪問當日系統正在測試中，所以文青淨係簡單地試咗一次，能夠比你嘅貼士係：如果你自問唔係一個能夠喺眾目睽睽之下高舉雙手集氣再用盡全力揈個元氣彈出去嘅人，就請出「蝦咩蝦咩蝦」啦。 | |
| |
| 會場仲會有「膠囊公司」外型嘅Pop-up Store，入面會有售台灣偶像汪東城設計嘅潮物以及海外特別被龍珠精品，當中包括籮咁大粒嘅龍珠，而且係一套七粒(可單買)，每粒盛惠$3XX。 | |
門口有幫阿媽看門口嘅杜拉格斯！
「武道會」場景後面仲有個超西悟空，令佢成為全場唯一一個出場兩次嘅角色。 | |
| 而喺商場嘅另一邊，就設置咗《我們的龍珠Z閃卡隧道》，由自細開始收集龍珠閃卡嘅80後Kenny借出珍藏展出。其中呢張集齊人嘅閃卡，仲係佢用$180蚊喺卡鋪買返黎！好羨慕(佢嗰個年代有咁多零用錢)呀！ | |
Kenny話呢兩張係佢印象之中最難儲嘅。其中第一張更加係用$180喺買返黎！
| |
| 黎緊星期六、日會場更會舉行東港城 x PlayStation 龍珠Z 「Dragon Ball Xenoverse大賽」初賽，優勝者更有機會遠赴東京參加9月份舉行的「Tokyo Game Show 2015」！ |
東港城 x 龍珠Z 《盛夏‧最強對最強》 | |
日期： | 2015年7月8日至8月31日 (共55天) |
時間： | 10:00am – 10:00pm |
地點： | 東港城一樓展覽場 |
費用： | 免費入場 |
東港城 x 龍珠Z 《我們的龍珠Z閃卡隧道》 | |
日期： | 2015年6月22日至8月31日 (共71天) |
時間： | 10:00am – 10:00pm |
地點： | 東港城一樓展廊 (近Mocha Jewellery) |
費用： | 免費入場 |
東港城 x PlayStation 龍珠Z 「Dragon Ball Xenoverse大賽」初賽 | |
日期： | 2015年7月11至12日 |
地點： | 東港城一樓展覽場 |
獎品： | 優勝者更有機會遠赴東京參加9月份舉行的 “Tokyo Game Show 2015”及贏取PlayStation電子遊戲程式等豐富獎品 |
