H&M真係好「疊水」，每次邀請合作嘅對象都肯定屬於巨星級別，好似Lady Gaga、Beyonce、Gisele Bundchen，個個名字響噹噹，無收番咁上下天文數字價錢，都咪駛旨意佢哋出動。嚟緊年底嘅聖誕節檔期，品牌又再次諗爆頭，煩惱邀請邊位巨星坐陣拍攝廣告大片，日前終於落實兼對外宣布，此人正是性格歌手Katy Perry！

Katy Perry不嬲都有啲合作關係，之前品牌嘅「Fashion against aids」活動，幫手做model影相之外，仲親力親為做飛到日本幫手宣傳，好鬼抵錫，同樣地，今次成為品牌聖誕女郎之後，就好識買口乖話H&m係促進佢識得建立自己個人風格嘅地方，咁多年就算家陣做咗超級巨星，個衣櫃依然有好多品牌嘅衫。咁識講嘢，唔搵你做主角都唔得啦！