一直以來，留級都畀人一種壞印象，例如冇用、不良、蠢、不思進取等等。以前學校班裡面有留級嘅學生，就算同佢玩得埋，都好少見到留級生會受女仔歡迎，試問好學生如多啦A夢入面嘅出木杉VS讀書成績差畀人label晒嘅大雄，除咗靜香之外，係女都揀出木杉吧？

不過，最近日本Twitter就討論緊一種新類別嘅男子，就係「留年男子（留級男子）」，呢個Topic其實係京都大學所製作嘅校內刊物「Chot★Better」以「留級」做主題嘅特集，估唔到最近又畀人拎返嚟講，當中就有提及，究竟留級生有咩吸引女仔嘅地方！一齊望吓先！

1）刺激女生母性本能
考試期間為咗得到學分，會不擇手段咁對別人低聲下氣。而好多女仔見到佢咁慘慘豬，都會激起母性本能，想對佢好，保護佢。

2）睇落特別孤獨
因為留級生嘅同學都順利升級，所以留級男子常常會畀人一種冇晒朋友，好孤獨嘅感覺，令女生特別留意佢。

3）謙虛
因為受過留級嘅挫折，所以比其他學生更謙虛學習，呢種低姿態都會好吸引女生。

4）有特別技能
好多留級生都因為某種技能出眾，相對學業就冇咁好，比如打波等等，無論咩才能，去到專業級，總有女仔會莫名其妙地欣賞。

5）大人嘅魅力
由於留級生年紀都大過自己（除非女生本來就唔係正路入學年齡），如果唔係，留級生都會有種較為成熟的感覺，令年紀較小的女生著迷。