韓風當道，港男紛紛拜倒於少女時代、2NE1、Apink、 Tara等等韓國女團，講到本港女團，港男可能會話：「 都ok嘅！」，但未必狂熱到冒住被炒魷都照樣「射波」 仆去機場等女神囉，少部份更會認為：港女點同韓妹比啊？ 「隔嚟飯香」從來都係國際級問題。你哋眼中輕視嘅香港女團， 偏偏已成功登陸韓國，喺當地發熱發亮，講緊嘅係來自香港嘅As One。
VIDEO
韓風面紗
As One係太陽娛樂文化嘅女子組合，成員包括隊長Shin、 主領舞Nata、新成員Chloe以及新成員Kayan。 出道至今，As One走韓風路線，衣著打扮、曲風、舞蹈等等，都似模似樣， 比得上韓國女團。四個成員私下各有所好。 Shin同Nata話喜歡歐、美嘅打扮，Shin︰「 其實我好Casual，都係著牛仔褲、T-Shirt就出街。」 Chole就咩風格都會嘗試，咩風格都鍾意； 咁表面上較男仔頭嘅Kayan呢？「我屬於運動型， 著衫舒服就得喇！」
咦？個個各有Style都可以變身做索爆韓妹，係得喎！不過， 唔係似韓星就一定成功，香港近年都出現唔少韓風組合， 但公眾似乎都太Buy，覺得佢哋東施效顰，咁As One有冇面對同樣難題先？ 先睇睇As One出道以來嘅成績再聽佢哋點講？As One經歷過組員變動，但仍keep住韓風路線。 初出道首支韓風派台作品MV上載短短5日，點擊率已破十萬， 引來極大迴響，亦得過本地獎項，包括「最暢銷本地新人組合」、「 最佳新人組合」等等，可見唔係靠Gimmick， 大家真心Like喎， 究竟點樣一改大家過去對香港韓風組合嘅印象，贏得大家歡心？
多元融合
隊長Shin解話︰「As One唔只有韓風，我哋有自己獨特嘅元素。正如K Pop都融入咗歐美Pop元素。 As One而家想做嘅係將K Pop融入As One自己嘅Style，希望有多啲新鮮感畀到大家。」
As One成功令自己有特色，唔只喺香港有好成績， 更以香港歌星姿態進軍韓國，遠赴韓國集訓，辛苦不在話下， 好似Kayan咁講，除咗每日要練唱歌跳舞， 有時更要喺疲勞狀態下投入歌曲，做個無時無刻都甜甜蜜蜜嘅少女， 聽到都覺得大壓力。Mean娜希望香港嘅巴打睇清楚， 香港女仔其實好有毅力，好捱得㗎！ As One而家睇番，話辛苦都係值得嘅。佢哋憑全新派台歌《 Candy Ball》（韓文版）， 得到韓國SBS同埋MBC有線電視台邀請出席音樂節目， 真係為港爭光！ 叻女係叻女，但面對一眾強勁嘅韓國女團，As One有咩Fight得過人哋？
Nata即刻笑住答︰「我哋嘅優勢就係我哋係外國人啦！」 蝦蝦蝦蝦蝦！原來隔離飯香係真嘅，你真風趣！
As One呢首揚威海外嘅歌《Candy Ball》由韓國頂級班底負責， 歌曲由Iggy和Yongbae作曲、編曲及監製， 韓國歌手Maybee（金恩智）作詞、由著名導演Zany Bro為MV執導。 首歌就係講少女甜蜜愛戀嘅心情好似糖咁Sweet，唔知As One4位成員戀愛時又會變成點嘅女生呢？
戀愛時嘅As One……
Nata︰我工作時候係個好理性嘅人，但我拍拖或者面對好鍾意嘅男仔時都會失去理智。
Kayan︰平時大家見到我，可能以為我好Man呀，或者男仔頭。其實，我拍拖嘅話會好小鳥依人㗎。
Shin︰我平時鍾意煮嘢食，會畀啲Surprise男朋友。
Chole︰拍拖嗰時呢，我會做返自己，好靜嘅， 我鍾意喺好Relax嘅狀況下拍拖。
面對咁Sweet嘅As One，MenClub嘅巴打們有冇一種墮入愛河嘅感覺， 好想同佢哋拍拖呢？ 特別嗚謝︰
8090s Party Room 借出場地
8090s Party Room
地址：新蒲崗七寶街利中工業大廈15樓B3室
電話：5225 7557
facebook https://www.facebook.com/8090spartyroom
